Saam 65 - Intas Etipup

SAAM 65.

1 Et imiahpas Atua a Tevit va naiheuc o un. 4 Era mun ahesmoij a ilpu atimi iji ig et ikni ra a Atua, va niji itai upene ura.

¹ AK Atua, eris idim ika, eri imiahpas euc Saion a ilpu atimi et eropse inliinmopora; uhpu lep ehneijid intas upyi asaig ehelum.

² Na atahaijeg intas alaigaheni u atimi aiek, erupu ahtag pam ehelum natimi asega.

³ Et esjilid irak nedo has: ja napu adahpoi nedo imipalea unyima aiek.

⁴ Et mun ahesmoij a natimi inig na ati yin aiek, um ika yi apam ubutpotet ehelum, um amen anliin nokora unyum: ecrupu geije aijama irai iji itai upene an neom unyum, neom ahlap unyum marom.

⁵ Ak Atua, na imiatamaig cama aiek, napu adai intas unyima aiek an nauritai imiali im nedo atoh; era asgeig iram a nup uran nobohtan asega, im lep nup u unjap, natimi iji ig marom era amen itac acen ara:

⁶ is ikni aktit niji edoon aien an nemda o un, et esjilid nemda o un:

⁷ et ahpu nigpa an jap aien, im inmotjan nepeau iran, im nehtauo o natimi.

⁸ Era lep imtitaig niji itai asjaaicnaig unyum ara sji igki, era amen ara irai uarin itac acen an nobohtan; na ika aiek eri imiacitak a nup an ridjai o un im lep nup an nete o un.

⁹ Na mun ateghe nobohtan aiek, um ika yi opoh; napu ika aiek yi idim upene; et amen inwai alupas an nofowai u Atua; napu ika aiek yi eteuc korn incara, as ago nobohtan vaig aiek.

¹⁰ Namu ika aiek yi opoh niji ahapol iran; yi lep asuol alupas incopda irai eucse wai; napu ika aiek yi yah nidin copda alupas u iji itai ededel; yi lep muhnul inceslum irai isjiisji.

¹¹ Et esjilid nedo upene unyum irai lidija im lep irai mesese; et ehcohos niji itai upene irai uarin na natga iran aiek.

¹² Er ecetai irai iji uarin an lelitai; et eteuc nimiacitak um arehed irai iji edoon.

¹³ Era ahinag acen siip anliin pece; et lep adahpoi niji iskanse korn; et eteuc nimiacitak, era lep acesaces nohranitai ara.