Saam 61 - Intas Etipup

SAAM 61.

1 Et aha ehele Atua a Tevit va nato itai o un an nopan iyehki. 4 Et ika aien, yi aheca o un aien irai iji adiat van tas upyi asaig o un.

¹ AK Atua, namu atahaijeg nahlaig unyak aiek; namu aktaktai nalaigaheni unyak aiek.

² Etu wit ohocred inliinmopok ainyak, ekpu ahlaig vai euc ainyak ahes an tid an nobohtan: namu atau irak aiek u inhehteuc et ijinies acen vai nyak.

³ Na mun uarin atpuh iran vai nyak aiek, im neom emda unyak, vai ilpu atimi tak atimi irak.

⁴ Ekpu amen ainyak an neom atga unyum nai iji adiat; ekpu atpuh ainyak ithan naiyu an nehpam. Sila.

⁵ Ak Atua, na mun idim atahaijeg intas upyi asaig unyak aiek: na mun alupai nyak nitai upene iji ig aiek era ohuun a ilpu atimi imtitaig nidam.

⁶ Napu ika aiek yi ahinag nadiat irai natimarid: etpu yetpan an taka opan niji mesese iran.

⁷ Ak Atua, etpu amen a natimarid an nuhup unyum irai iji mesese: namu imiatamaig yin aiek an nedo aiheuc unyum, im nedo inveijec unyum.

⁸ Et uco, ekpu imiahpas nidam ainyak irai iji mesese, um ehneijid intas upyi asaig unyak irai iji adiat.