Saam 58 - Intas Etipup

SAAM 58.

1 Et acaiji ilpu atimi tas alep iji ig a Tevit et acalacal nedo ura. 3 Et asuptecnaig nedo o ilpu atimi auatatimi aien, 6 um ika, etpu aru nedo ura a Atua. 10 Erupu imiacitak vaig a ilpu atimi upene.

¹ AK ilpu atimi alupas, eka idim eti tas aijaua an nopan asan tas atoh, im lep an nopan asan tas alep upene va atimi.

² Et inveijec, nikavaig, eka ago nedo has an liinmopomia aijaua; eka ago nedo ipjin irai ikmamia aijaua an pece uja.

³ Era ahnag a ilpu atimi auatatimi an nopan apos ra; era ahnag ara an halav ura, um asan tas ahcil.

⁴ Et amen ehele ra nitai acen, et idivaig nitai acen u nimyeuv has: era idivaig nimyeuv ara, et ucjipines intikgan aien um eti ahgei itai;

⁵ et eti atahaijeg nohrai ilpu atimi eipai yin ara, eru wit eipai yin ara an nedo arapakau esjilid ura.

⁶ Ak Atua, namu ahti neijira aiek an nipjineucsera; Ak Ihova, namu ahtasvi niji uctai laion emda iji ehki aiek.

⁷ Erumu atiih ara, et idivaig inwai et yah irai iji adiat; etu wit aiyihi nefana o un a Atwa, uhmu asjaldei sjipe ra.

⁸ Erumu emesmas ara asega, et idivaig intikia et auroauro um updak; um lep idivaig inhalav et areuctikgan iran a risin, mika eri jim almoi nagesega ara.

⁹ Etu wit eti fi ehri nipjiuru unyimia an cap irai cai upunupun, etpu ahlaadai ra aien an naop yi atmas, el et mat nitai caig unyimia, ka et mun yap.

¹⁰ Erupu imiacitak a ilpu atimi upene, vaig inig nikavaig, erupu almoi neruvaig nedo has ura ara; erupu areuc neduora ara an ja irai ilpu atimi auatatimi.

¹¹ Erupu lep ika natimi, Maiya, et idim eteuc nimtan imi ilpu atimi upene: et idim eteuc a Atua inig et tas alep va atimi an nobohtan aien.