Saam 56 - Intas Etipup

SAAM 56.

1 Et alaigaheni vai Atua a Tevit, um imiisjis ninveijec intas o un; et asan ehti aien vai ilpu atimi tak atimi iran. 9 Et asuptecnaig aien, um ika, et imiisjis ninveijec intas o Atua aien, um lep ika, etpu imiahpas yin aien.

¹ AK Atua, namu aiheuc vai nyak aiek: era merit natimi par atleg nyak; era ehtipidai nyak an nadiat asega a ilpu atimi edemda vai nyak.

² Era ika a ilpu atimi tak atimi irak eri atleg nyak irai iji adiat: ak Atua esjilid acen, era ahinag ara sji igki era ago nedoa vai nyak ara.

³ An nadiat iyehki eku wit imtitaig ainyak, ekpu asgeig iram ainyak.

⁴ Ekpu imiahpas Atua ainyak vai intas o un, ek mun asgeig irai Atua ainyak; inki eti imtitaig ainyak, et ehka vaig tah par ago tah nitai vai nyak.

⁵ Era asaig acalacal intas unyak ara irai iji adiat: era ika ara eri auahas nyak ara an naktaktai asega ura vai nyak.

⁶ Erupu asjapicnaig ara, erupu atpuh ara, erupu almaijidjid natga unyak a ilpu atimi ahiyek nyak, et idivaig era mun atpaijinaig nyak ara par atgei nyak.

⁷ Eris aha pan ara va nedo auatatimi ura; ak Atua, namu imiasuol nup urai pece aiek an tavaitap unyum.

⁸ Na mun esvi natga sjipe unyak aiek: namu ati nidiimtak an hubej unyum aiek: et lep idim amen an nitaasviitai unyum.

⁹ Eku wit ahlaig vai euc ainyak, erupu adumoij pan itac a ilpu atimi tak atimi irak: ek ato nitai inigki ainyak, mika et idim amen ehelek a Atua.

¹⁰ Ekpu imiahpas Atua ainyak vai intas o un: ekpu idim imiahpas Ihova ainyak vai intas o un.

¹¹ Ek mun asgeig ira Atua ainyak; inki eti imtitaig ainyak, et elika va atimi par ago tah nitai vai nyak.

¹² Ak Atua, et amen irak intas upyi asaig unyak ehelum: ekpu ahlap irai iji itai ahlap naaurinig vai euc ainyak.

¹³ Na mun imiatamaig nyak aiek van mas: namu lep aminjinaig neduok aiek vai ki jim epihtau ainyak, va ekpu atga ainyak an nuhup u Atua an lah u ilpu atimi umumoh.