Saam 55 - Intas Etipup

SAAM 55.

1 Et alaigaheni a Tevit, um taig tas va namen has o un. 9 Et ugyi Atua aien mika yi aat irai ilpu atimi tak atimi iran; et asan ehti aien va nedo has ura im nedo efaifa ura vai yin. 16 Et adi lelen aien, nikavaig, etpu imiaras yin a Atua, um auoh ehcamai ilpu atimi edemda vai yin.

¹ AK Atua, namu atahaijeg nalaigaheni unyak aiek; um jim adenai euc vai intas ugyi unyak.

² Namu atahaijeg nyak aiek, um adai intas unyak; ekpu aktaktai alupas ainyak um aunyauwaig;

³ va nohrai ilpu atimi tak atimi irak, im nedo ipjin u ilpu atimi auatatimi: erupu atijai nedo has irak ara, um imiisjis an nedemda ura.

⁴ Et ohocred alupas inliinmopok ainyak: et mun imtitaig ainyak van mas.

⁵ Ek imtitaig ainyak umeucjeucjeucaij, et mun lep ataluopni pam nyak netehto.

⁶ Kis ika ainyak. Ah! ek merit ainyak vai nehpak et idivaig nuucip, mika ki ae pan an taka uarin ainyak, um tup eklim amen.

⁷ Ekpu idim apan itac acen ainyak, um amen an namasacen. Sila.

⁸ Ekpu auroauro ainyak um aha va nimtinjap alupas im nehio.

⁹ Ak Natimarid, namu auahas ra aiek, um ika eri jim ato jipe intas ura ara; kis idim ecetai nehcerucai atimi ura ainyak im nehtauo ura au maliyum.

¹⁰ Erupu arehed iran ara ijinies ira athatahau ira adiat im nepig: etpu lep amen iran nedo ahnag im nohocred.

¹¹ Et amen nedo has an maliyum, etpu amen aktit nedo ipjin im nedo efaifa irai iji tiptag eahki.

¹² El et atuh nyak a natimi tak atimi irak, el ek eti aktaktai ainyak: el et ika aien et amcel vai nyak aien et esjilid irak aien, el ek atpuh vai yin ainyak;

¹³ ja as ago aiek at igki, ak napa unyak, im nahaijik, im etwak.

¹⁴ Intis tastas upene sjipe akaijau, um ehras apau an neom o Atua, um imiahpas yin.

¹⁵ Etpu yetpam inmas ira ra; erupu lep auroauro ara um asuol uma atmas ara: et idim amen nedo has irai iji imnim ura, im lep an liinmopora.

¹⁶ Ja ekpu idim ahlaig vai Atua ainyak; etpu lep imiatamaig nyak a Ihova.

¹⁷ Ekpu ago nalaigaheni ainyak, um ahlaig ijinies an jupura, im nuhialeg, im nadiatadiat: et mun lep atahaijeg nohrak aien.

¹⁸ Is imiatamaig nyak aien, um ika ki amen igpa va nedoa eris ati vai nyak; eris idim aat irak natimi is ahinag.

¹⁹ Etpu atahaijeg a Atua, um aru ira ra, aien marom is eteuc aien irai iji mesese. Sila. Et eti eche namen ura, va nitai inigki, era eti imtitaig Atua ara.

²⁰ Et mun atgeig yi apidi nikman aien vai ra eris atau imi yin ara: et mun imipalea intas etipup u Atua aien.

²¹ Et upene intas o un um idivaig nidenided, ja is amen nedoa an liinmopon: et updak intas o un um idivaig narakei, jam esjilid irai nauitoga auhaig jipe.

²² Namu atcijaig vai Ihova nitai auoh ohocred euc aiek, etpu lep atau imi euc aien: etpu idim aminjinaig ilpu atimi upene aien irai iji opan, vai eri jim amaamai ara.

²³ Ja napu imiasuol ra aiek, ak Atua, anliin nehpanitai emesmas iran: erupu umumoh ira ahaiji adiat ira ra ache a ilpu atimi atgei atmas im ilpu atimi efaifa; ja ekpu asgeig iram ainyak.