Saam 53 - Intas Etipup

SAAM 53.

1 Et a upteenaig nedo has u natimi inig a Tevit et eteuc inliinmopon itu. 4 Et acaiji ilpu atimi auatatimi aien an lah u inliinmopora. 6 Et imiahpas Atua aien va nimiatamaig yin o un.

¹ ET ika an liinmmpon a natimi inig et ahnag aien, Et ti tah Atua. Era has esjilid ara, era mun ago nedo er amcel vaig ara: et eti ago nedo upene tah.

² Et mun amen a Atua an nohatag um ias se pam, par alum atimi, um ato, kit is ago nedo arapakau tah ra, um ahilek Atua, ka oʼo.

³ Era mun adumoij pan itac ara asega, era ehras eheshas ara: et eti ago nedo upene tah, et idim ti tah.

⁴ Era idim eti ato itai a ilpu atimi auatatimi iji igki; era auahas ilpu atimi unyak ara, et idivaig era caig nitai caig ura ara, um eti arohwai Atua.

⁵ Is esjilid acen nimtitaig ura eahki, is wat ti nitai imtitaig vaig: is idim imiterimterim niji eduei natimi iji igki a Atua, eris ati nedoa vai euc ara: na mun auoh ehcamai ra aiek, nikavaig, et mun esjum vai ra a Atua.

⁶ Ek merit alupas ainyak mika yi ahes Saion tah um imiatamaig nup Isreel! Etu wit imiadumoij ilpu atimi o un a Atua eris lucsei pan ra, erumu imiacitak a ilpu mapoi Jekob, erumu lep cediaig a nup Isreel.