Saam 50 - Intas Etipup

SAAM 50.

1 Intas nigki va natimi alupas u Atua irai up an nakalasia o un. 5 Intas alep o un mika eri asjapicnaig ilpu atimi o un. 7 Et eti upene inliinmopoi Atua vai ilpu atimi iji ig era ahlap itai ara, 14 ja vai ilpu atimi iji ig et inveijec inliinmopora.

¹ ET mun tas a Atua inig et emda acen aien, Ihova marom, um ahlaig vai nup uran nobohtan, ahes au ridjai u nagesega um yetpan an nete o un.

² Et naunau a Atua an nedoon Saion, nuarin esjilid acen.

³ Etpu yetpam a Atua uja, etmu jim eucsup aien: etpu atnamud itai incap an nuhup o un; etpu amen nehio alupas acen, um arehed iran.

⁴ Etpu ahlaig aien vai nup uran nohatag ijinies, im lep vai nup uran nobohtan; nikavaig, etpu asuptecnaig nimtan imi ilpu atimi o un aien, um ika,

⁵ Uhmu asjapicnaig pam ehelek ilpu atimi upene unyak; ra sji igki marom, eris asan tas etipup ehelek ara irai iji itai ahlap iran.

⁶ Era mun ehvaig nedo atoh o un a nup uran nohatag; et idim atimi almaijidjid a Atua. Sila.

⁷ Ak ilpu atimi unyak, akumu atahaijeg aijaua, ekpu tas ainyak; ak nup Isreel, ekpu lep asuptecnaig nedo unyimia ainyak: ek Atua ainyak, Atua unyimia marom.

⁸ Inki eti ated caua ainyak va niji itai ahlap unyimia, im niji itai ahlap atnamud unyimia, er ago an nuhup unyak irai iji adiat.

⁹ Inki eti leh tah kurimatau atamaig ainyak irai imnim unyimia, ka hal anin atamaig irai irahed unyimia.

¹⁰ Et unyak ache niji itai eklim edo irai pece asega an lelitai, im kurimatau irai edoon et ahinag.

¹¹ Ek ato ainyak niji man asega ivai edoon: et lep unyak niji itai eklim edo irai pece aleg.

¹² El et ehtele nyak ainyak, el ek eti asaig ehelemia ainyak: et idim unvak nobohtan, im niji itai asega iran.

¹³ Ja ekpu eti caig nohui kurimatau atamaig ainyak, um eti umnyi inja irai anin.

¹⁴ Akumu ago naaurinig vai Atua aijaua, um ahlap niji itai ahlap imi yin, um ehneijid intas upyi asaig unyimia vai Atua esjilid acen.

¹⁵ Akumu ahlaig vai nyak an nopan ohocred unyimia aijaua: ekpu imiatamaig caua ainyak, akupu lep imiahpas nyak aijaua.

¹⁶ Ja et ika a Atua ehele ilpu atimi auatatimi, Eka a uri aijaua par asuptecnaig intas alep unvak, um lep tas vai intas etipup unyak?

¹⁷ Eka mun idim amcel vai nesege aijaua, um lep erekhaig an cehemia intas unyak.

¹⁸ Akis wat ecet natimi ehneg itai aijaua, akis lep ethi ache pan iran aijaua; akis lep asipiaig nedo o ilpu atimi ago ingeijid aijaua.

¹⁹ Et ahes intas has an nipjineucsemia, eka lep asaig intas efaifa aijaua.

²⁰ Akupu ateuc aijaua um tas vai ilpu etwamia; akupu asan tas has aijaua vai inhalav atamaig u risumia.

²¹ Eka mun ago nitai iji igki aijaua, ja kis eti tas ainyak; eka mun aktaktai aijaua mika kis idivai caua ainyak: ja ekpu ated caua ainyak um asaig niji edo has unyimia an nuhup u nesganimtamia.

²² Akumu aktaktai nitai inigki aijaua, eka eti imiehva Atua aijaua, vai ki jim ces yi oplecoplec caua ainyak, ja inyi eti imiatamaig caua tah.

²³ Etpu imiahpas nyak aien et ahlap vai nyak an tas naaurinig aien: etpu lep ato nitai imiatamaig atimi o Atua aien et ago nedo Upene aien.