Saam 49 - Intas Etipup

SAAM 49.

1 Er tas emda ehele atimi, mika eri asgeig ira Atua, jam eti an naga ura, va nusjai u nohura vai inmas ura. 16 Et eti upene va atimi par merit alupas, mika eri amen upene an nobohtan ache.

¹ AKUMU atahaijeg intas inigki aijaua, ak nup urai iji pece asega: akumu atgeig pam intikgamia aijaua, ak nup uran nobohtan asega;

² ilpu atimi upoupo, im ilpu atimi esjilid, im ilpu atimi ikni itai, im ilpu ihki atimi.

³ Etpu asan tas arapakau nipjineucsek ainyak; etpu lep amarero naktaktai u inliinmopok.

⁴ Ekpu atgeig pam intikgak ainyak vai intas ecsipece: ekpu aihiupdicraig intas adenaig unyak ainyak an nohranitai irai harp.

⁵ Ek a uri ainyak par imtitaig an nopan ohocred unyak, etu wit arehed irak nedo auatatimi u ilpu atimi ehcerucai nyak?

⁶ Era asgeig an nemda ura natimi, um imiacitak inpadiaig alupas ura;

⁷ ja et elika vaig tah ra par imiatamaig etwan; et lep ehka vaig tah natimi par alupai Atua nimtan vai yin;

⁸ (et idim ehka par alupai nimtan mika eri umumoh ara um eti tiih, et idim ehka irai iji mesese:)

⁹ mika yi umoh aien irai iji mesese, um eti asuol anliin nehpanitai.

¹⁰ Etpu asuol aien, erupu emesmas a ilpu atimi arapakau, erupu lep tiih a ilpu atimi ahnag im ilpu atimi auatatimi, um atcijaig inpadiaig ura imi atimi et eche.

¹¹ Et aktaktai inliinmopora ara, mika yi amen niji imnim ura irai iji mesese, im lep niji uarin amen nan ura irai iji opan asega; et ilpun nidara niji uari obohtan ura.

¹² Ja erupu eti amen aktit natimi an namen upene ura: era idivaig niji itai eklim edo irai pece ara, erupu emesmas ara.

¹³ Et tup ethi ache namen ura im nedo ahnag ura, ja era imiacitak intas ura a ilpu mapora. Sila.

¹⁴ Er ikni ra anliin nehpanitai et idivaig siip; et asgi ra inmas; erupu lep auroauro a ilpu atimi upene um esjilid ira ra; erupu ahes irai uarin amen ura ara, um asuol an nehpanitai; uhpu auahas neklim upene ura eahki.

¹⁵ Ja etpu imiatamaig nyak a Atua ache va nemda u nehpanitai; etpu idim leh nyak aien. Sila.

¹⁶ Namu jim imtitaig aiek, etu wit ikni itai tah, um lep esjilid natimi alupas u ilpu atimi ehpan iran;

¹⁷ etu wit mas aien, inyi eti lucsei pan tah nitai aien: inyi eti asuol se ehelen natimi alupas o un.

¹⁸ Nikavaig, is wat umoh aien, is imiahpas yin aien: erupu lep imiahpas euc natimi, nau wit ago nedo upene vai euc aiek.

¹⁹ Etpu yetpan aien ehele ilpu retpon asega; eri eti lep ecetai inlah ara irai iji mesese.

²⁰ Era idivaig niji itai eklim edo irai pece ara, erupu emesmas natimi iji ig et upene namen ura, jam eti aktaktai.