Saam 45 - Intas Etipup

SAAM 45.

1 Intas nigki va natimi alupas im nelcau u Kristo, im nedo aiheuc o un. 10 Nedo upene va nup an nakalasia o un vai yin, im niji itai upene etpu ahes iran.

¹ Et ehlohos intas upene an liinmopok; ek tas ainyak va nitai iji igki kis ago ainyak vai Natimarid: etmu idivaig pen u natimi aged auroauro nipjineucsek.

² Na eklim upene aiek, na eklim upene aiek, um esjilid ira atimi; er ati intas updak an nipjineucsem; va nitai inigki, et asan tas acis yi alwai euc a Atua irai iji mesese.

³ Namu alcaijiraig nauitoga unyum aiek an nahaijum, ak Natimarid emda, vai natimi alupas unyum im nemda unyum.

⁴ Um ateuc irai jariot, um apan an nemda unyum vai intas inveijec, im nedo igpa, im nedo upene; etpu ehvaigehelum niji itai er imtitaig vaig inmatam.

⁵ Et arig nefana unyum iraili mopoi ilpu atimi edemda, vai Natimarid; erupu eropropse a nup urai iji pece an nuhup unyum,

⁶ Ak Atua, et eteuc natimi alupas unyum irai iji mesese: na ago nedo atoh aiek an nelcau unyum.

⁷ Nai merit va nedo upene aiek, jam amcel va nedo has: va nitai inigki, et mun aspi euc an narakei imiacitak a Atua, Atua unyum marom, mika an esjilid aiek irai ilpu etwam.

⁸ Et auanipi mura, im alos, im kasia, napelumai asega unyum, irai iji imnim atimi eris yecrei upene asega, nai imiacitak vaig aiek.

⁹ Era amen ehele ilpu takata esga atimi unyum a ilpu halav atahig u ilpu atimarid: et amen a natimarid atahig an matam, er aso yin a colt an pece Ofir.

¹⁰ Ak inhalav atahig unyak, namu atahaijeg aiek, um aktaktai, um atgeig pam intikgam ehelek; jim imiehva inpece unyum, im lep ra an nimnim u etmam:

¹¹ etmu lep merit vai neklim upene unyum a natimarid: et idim Natimarid unyum aien; namu ecen vai yin aiek.

¹² Erupu imiapam nitai tup ahtai ehelum a nup u Tairus, im ilpu atimi ikni itai u nup urai iji pece, mika yi upene inliinmopom aiek vai ra.

¹³ Er yecrei upene asega inhalav atahig u natimarid anliin neom o un; er ijei colt ira apelumai o un.

¹⁴ Uhpu imiapan yin ehele Natimarid ira apelumai esjilid: uhpu lep imiapam ehelum ilpu atahig, ilpu etwan iji ig marom; era amen ehelen ara, um apitac yin.

¹⁵ Uhpu imiapam ra an nimiacitak um cediaig; erupu apan ara an nimnim atimi u Natimarid.

¹⁶ Erupu isjeupigmoig ilpu retpora a ilpu hat unyum; napu lep ikni ra aiek, mika eri ilpu atimi alupas ara an nobohtan asega.

¹⁷ Ekpu ika ainyak eri imiehva nidam irai iji mesese: va nitai inigki, erupu imiahpas euc a nup urai iji pece irai iji opan asega.