Saam 44 - Intas Etipup

SAAM 44.

1 Era imiehva namen upene ura an nopan iyehki a nup an nakalasia u Atua, 7 um taig tas va namen has ura an nopan inig. 17 Era asuptecnaig nedo inveijec ura ara, 23 um emda mika yi atau ira ra aien.

¹ AK Atua, ecris atahaijeg irai tikgama aijama, eris asaig ehelema a ilpu retpoma, nauritai inig as ago aiek an nopan umumoh ura, itu acen.

² As ahlo nup urai iji pece aiek an nikmam, um ikni aktit ra; as auwihi se atimi iji ehki aiek, um ika eri ahinag acen ara.

³ Vaig inig nikavaig, eris eti ohuun inpece ara va nij va atimi ura, is lep eti imiatamaig ra nikmara; jai inmatam im nikmam, im inlah an nesganimtam, as idim aiheuc vai ra aiek.

⁴ Ak Atua, na Atimarid unyak aiek: namu asaig aiek mika uhpu imiatamaig ilpu mapoi Jekob.

⁵ Ecrupu ahtahlo ilpu atimi tak atimi irama aijama vai euc: ecrupu lep auwihi se ra sji igki aijama va nidam, era aat irama ara.

⁶ Inki idim eti asgeig an ceen nefana unvak ainyak, inyi eti lep imiatamaig nyak nauitoga unyak.

⁷ Ja na mun imiatamaig cama aiek vai ilpu atimi tak atimi irama; na mun lep ika aiek eri ehcamai a ilpu atimi amcel vai cama.

⁸ Ecra mun imiahpas Atua aijama ira adiat asega; ecrupu lep ago naaurinig va nidam aijama irai iji mesese. Sila.

⁹ Ja na mun atcijaig cama aiek, um ika ecri ehcamai aijama; na esjum aiek par atau irai ilpu eucsupo unyima.

¹⁰ Napu imiadumoij cama aiek vai ilpu atimi tak atimi irama; era tup ispara atoraliak itai unyima a ilpu atimi amcel vai cama.

¹¹ Napu atcijaig cama aiek et idivaig siip eh caig; na mun imiterimterim cama ehele nup urai iji pece.

¹² Napu ahtai nup uran pece unyum aiek vai takitai, um eti ikni itai va nimtara.

¹³ Napu ikni cama aiek, mika eri asan tas has vai cama a ilpu atimi eblaamnem unyima; erupu lep imilaav cama ara sji igki era amen arehed irama ara, um imiafakahcil cama.

¹⁴ Napu ikni cama aiek, mika eri tas auyat vai cama a nup urai iji pece; erupu lep auhohaig nidjinira vai cama a nup urai iji elcau.

¹⁵ Et eteuc nohocred unyak an nuhup unyak irai iji adiat; et mun lep ataluopni pam nyak nitai ehcamai vaig unyak,

¹⁶ va nohran natimi inig et atuh nyak aien um asan tas has; im lep va nesganimtai natimi inig et edemda vai nyak aien, um aru irak.

¹⁷ Et mun yetpam irama nitai iji igki asega; ja ecra mun eti ahnag iram aijama; ecra mun lep eti efaifa van tas etipup unyum aijama.

¹⁸ Et mun eti adumoij inliinmopoma aijama; ecra mun lep eti udei nefalaig unyum aijama;

¹⁹ ja na mun ati nohocred aiek an nuarin amen nan niji itai aleg, um ataluopni pam cama an napat u inmas.

²⁰ El ecra ahnag an nidai Atua unyima aijama, um adaig jai nikmama vaig tah natmas an taka pece;

²¹ etpu idim ahilek nedo inigki a Atua; et idim ato aien niji itai adenaig an liinmopoi atimi.

²² Vaig inig nikavaig, er auahas cama ira adiat asega vai euc; er ika vai cama ecra siip aijama eri atgei.

²³ Ak Natimarid, namu aiji lahlah aiek; na a uri aiek par umjeg? atidai aiek, um jim amcel vai cama irai iji mesese.

²⁴ Na a uri aiek par adenaig nesganimtam, um eti imiehva nohocred unyima im natmas piv vai cama?

²⁵ Et idim asuol pan an mah an nobohtan inliinmopoma aijama; et lep apol an nobohtan nohuma.

²⁶ Namu atidai aiek, um atau imi cama, um imiatamaig cama va naiheuc unyum.