Saam 42 - Intas Etipup

SAAM 42.

1 Et merit alupas a Tevit par ago nauritai u Atua an neom itap o un. 5 Et ahugni inliinmopon aien par asgeig ira Atua.

¹ AK Atua, et idim merit vai inwai yah a nanin aleg; et um uco, et merit alupas vai euc inliinmopok ainyak.

² Et mun merit emda inliinmopok ainyak vai Atua, vai Atua umoh marom; ekpu apan ainyak an nahopan, um ehcohos an nuhup u Atua?

³ Is itai caig incak nidiimtak ira adiat im nepig, eris wat ika ehelek ara irai iji adiat, Atua unyum yek eda?

⁴ Ekpu imiehva nitai iji igki ainyak; etpu lep aktaktai alupas inliinmopok ainyak, eku wit ahced atimi inyi ahinag ainyak, um yetpan an nimnim u Atua, um atau ira ra, um asan tas imiacitak im naaurinig, um apos nadiat asjapicnaig ura.

⁵ Et auatialidi inliinmopok ainyak vanhe? et lep ehioehio vanhe? etmu aitgai Atua inliinmopok ainyak: ekpu idim imiahpas yin ainyak, va nedo imiatamaig nyak et ahes ehelen.

⁶ Ak Atua unyak, et auatialidi inliinmopok ainyak: va nitai inigki, ekpu imiehva euc ainyak an pece Jortan, im inpece Hermon, im lep an nedoon Maisar.

⁷ Et ahlaig jipe intupahuahau et ethi vai intupahuahau et eche van motjan jap unyum: is ataluopni nyak nepeau asega unyum im naa asega unyum.

⁸ Etpu asaig naiheuc o un a Ihova irai iji adiat; etpu lep amen nohranitai vai yin ehelek irai iji epig; ekpu alaigaheni ainyak va Atua inig ek umoh vai yin ainyak.

⁹ Ekpu ika ainyak ehele Atua, Nai hehteuc unvak aiek, na a uri aiek par eti imiehva nyak? ek a uri ainyak, er idim ika ki atga ainyak um taig va nedo ehcerucai u ilpu atimi edemda vai nyak?

¹⁰ Et idivaig nauitoga irai iji eduok intas has u ilpu atimi tak atimi irak; era wat asaig ehelek ara irai iji adiat, um ika, Atua unyum yek eda?

¹¹ Et auatialidi inliinmopok ainyak vanhe? et lep ehioehio vanhe? etmu aitgaig Atua inliinmopok ainyak; ekpu idim imiahpas yin ainyak, et ika aien yi lah nesganimtak ainyak, et lep Atua unyak aien.