Saam 41 - Intas Etipup

SAAM 41.

1 Et aminjinaig ilpu ihki atimi a Atua. 4 Et taig tas a. Tevit va nedo efaifa u ilpu atimi tak atimi iran. 10 Et aha ehele Atua aien mika yi imicoho yin.

¹ ET mun ahesmoij a natimi inig et ago nedo inig aien et tau upene vai ilpu ihki atimi; etpu imiatamaig yiu a Ihova an nopan ohocred o un.

² Etpu aminjinai yin a Ihova, um ika yi umoh aien: etpu amen upene an pece o un aien, namu jim atcijai ehni yin imi ilpu atimi tak atimi iran aiek.

³ Etpu imiatidai yin a Ihova, etu wit asjeuc aien va nauatialidi o un; na mun ago upene intinan asega aiek an nopan nemehe o un.

⁴ Ek mun ika ainyak, Ak Ihova, namu aiheuc vai nyak aiek: ago cehcehe nyak; ek mun idim ago nedo has vai euc ainyak.

⁵ Era asan tas has vai nyak a ilpu atimi tak atimi irak, um ika, Etpu mas aien au nahopan, um lep tiih nidan?

⁶ El et ham tah ira ra par alum nyak, et tas ahcil aien: et aktaktai has an liinmopon aien; etu wit alau ijo aien, etpu asuptecnaig aien.

⁷ Era ehritas ilohol vai nyak ara asega; era amcel vai nyak ara, um ika,

⁸ Er atijai intas has iran; et asjeuc aien, ja inyi eti lep atidai aien.

⁹ Is lep aat irak um auhi nyak a natimi inig is etwak upene aien, kis asgeig iran ainyak, is lep asipiaig nitai caig unyak aien.

¹⁰ Ja namu aiheuc vai nyak aiek, ak Ihova, um imiatidai nyak, mika ki aru ira ra ainyak.

¹¹ Ek ato ainyak mika et upene inliinmopom aiek vai nyak, vaig inig nikavaig, inyi eti esjilid irak a natimi edemda vai nyak.

¹² Kis wat ago nedo atoh ainyak, na mun asjiraig nyak aiek an nuhup unyum irai iji mesese.

¹³ Naaurinig vai Ihova Atua u nup Isreel, ahes irai iji mesese um yetpan irai iji mesese asega. Eris idim ika, ki aiji ainyak, um avaktit nyak.