Saam 40 - Intas Etipup

SAAM 40.

1 Et upene par asgeig ira Atua. 6 Et esjilid nimiaiji intas o Atua irai iji itai ahlap. 11 Et alaigaheni emda a Tevit, vaig inig nikavaig, et ohocred aien va namen has o un.

¹ KIS aitgaig upene Ihova ainyak; is atgeig pani intikgan aien vai intas unyak, um atahaijeg nahlaig unyak.

² Is aiyihi jai nyak aien an nehpanitai has, im lep an nuarin osal, um ati neduok ijinies an hehteuc; is um ago aktit natga unyak aien.

³ Is ati nohranitai mat an nipjineucsck aien, nimiahpas vai Atua uja marom; erupu ecetai natimi et ahinag, um imtitaig, um asgeig irai Ihova.

⁴ Et mun ahesmoij a natimi inig et asgeig irai Ihova aien, um eti apol wai ilpu atimi ijinies inliinmopora, im lep ra era ahidaig pan ra u nedo ahcil ara.

⁵ Ak Ihova Atua unyak, et ahinag niji auritai imiali unyum as ago aiek, im naktaktai unyum vai cama: et ehka par asuptecnaig ehelum; ek ika ainyak ki asuptecnaig ainyak um tas vaig, ja et ahinag acen um elika nesvi vaig.

⁶ As eti merit aiek va niji itai ahlap im niji itai tup ahtai: as aiji intikgak aiek: as eti asaig niji itai ahlap atnamud aiek im niji itai ahlap va nedo has.

⁷ Va nitai inigki, kis ika ainyak, Ek idim ham ainyak: eris aged intas vai nyak an nitaasviitai itap;

⁸ ek mun imiacitak ainyak nimiaiji vaig intas unyum, ak Atua unyak; et idim amen intas alep unyum an liinmopok.

⁹ Ek mun asuptecnaig nedo atoh ainyak an nasjapicnaig u ilpu atimi et ahinag: ekpu idim eti eucsup ainyak, ak Ihova, na mun ato aiek.

¹⁰ Ek mun eti adenaig nedo atoh unyum ainyak an liinmopok; ek mun asuptecnaig nedo inveijec unyum ainyak, im nimiatamaig atimi unyum: ek mun eti ateri naiheuc esjilid unyum ainyak, im nedo inveijec unyum, an nasjapicnaig u ilpu atimi et ahinag.

¹¹ Ak Ihova, napu eti imiaaij vai nyak nedo aiheuc unyum aiek: etpu aminjinai nyak naiheuc unyum im nedo inveijec unyum wai iji adiat.

¹² Et idim arehed irak niji ohocred et ahinag acen: et mun uhum nyak nedo has asega unyak, et lep elika vai nyak par alum itai; et idim ahinag nedo has unyak, jam eti elpat numri idjinik: et lep auatialidi inliinmopok ainyak.

¹³ Ak Ihova, namu aiheuc vai nyak aiek, um imiatamaig nyak; ak Ihova, namu auroauro aiek um atau imi nyak.

¹⁴ Erumu ehras ehcamai um ohocred ara sji igki, era ahilek nyak ara par auahas nyak; uhmu imiadumoij pan itac ra sji igki, era merit ara mika ki has ainyak; erumu lep ehcamai ara.

¹⁵ Erumu tup echim amen ara sji igki va nehcamai ura, era ika ehelek ara, Aha, aha.

¹⁶ Erupu imiacitak um cediaig vai euc ara sji igki asega era ahilek euc ara: erumu tas ara sji igki irai iji adiat, era merit ara vai nimiatamaig atimi unyum, um ika, Et esjilid a Ihova.

¹⁷ Ja ek ohocred ainyak um ilikin natimi; ja et aktaktai nyak a Natimarid: na atau imi nyak aiek, um imiatamaig nyak; ak Atua unyak, namu jim ecrap aiek.