Saam 4 - Intas Etipup

SAAM 4.

1 Et ugyi Atua a Tevit mika yi atahaijeg yin aien. 2 Et acaiji ilpu atimi tak atimi iran aien um ated ra. 6 Era amen upene natimi iji ig et upene inliinmopoi Atua vai ra.

¹ NAMU atahaijeg intas unyak aiek an nahlaig unyak, ak Atua upene unyak: as imiatamaig nyak aiek an nohocred unyak; namu aiheuc vai nyak aiek, um atahaijeg nalaigaheni unyak.

² Ak ilpu atimi alupas, akupu imiasuol natimi alupas unyak aijaua, um yetpan an nahopan? akupu merit vai intakitai aijaua, um ago nedo ahcil, um yetpan an nahopan? Sila.

³ Akumu lep ato aijaua mika, is ati imi yin a Ihova natimi inig et upene aien: eku wit ahlaig vai Ihova ainyak, etpu atahaijeg aien.

⁴ Akumu jim edemda aijaua, um jim ago nedo has; akumu aktaktai an liinmopomia aijaua an tinamia, um tup eklim amen. Sila.

⁵ Akumu ahlap aijaua irai itai ahlap an liinmopomia inveijec, um asgeig irai Ihova.

⁶ Era ika natimi et ahinag, Etpu ehvaig eheleija tah nitai upene a di? Ak Ihova, etmu lah pam nesganimtam aiek vai cama.

⁷ As ati nimiacitak an liinmopok aiek, is esjilid iran ura, is wat alupas korn im nide vaine ura.

⁸ Ekpu asjeuc ainyak, um lep umjeg, jam eti imtitaig; vaig inig nikavaig, nai ika aiek ache, ak Ihova, ki amen upene ainyak.