Saam 39 - Intas Etipup

SAAM 39.

1 Et aminjinaig naktaktai o un a Tevit. 4 Et aktaktai aien, um ika, et ipjidipjid nitai umoh iran, um takitai. 7 Et ecen ra Atua aien va neruvaig o un, 10 um alaigaheni, vai yi jim ipjiecek aien.

¹ KIS ika ainyak, Ekpu aminjinaig nedo unyak ainyak, vai yi jira ago nedo has nipjineucsek ainyak: ekpu aminjinaig nipjineucsek ainyak an nitai atapnes, eru wit amen a ilpu atimi auatatimi an nuhup unyak.

² Kis idim eucsup ainyak, um eti tas va niji itai upene; is lep alupas nohocred unvak.

³ Is cas inliinmopok ainyak; kis wat aktaktai ainyak is ehri incap: ja kis par tas au nipjineuesek ainyak, um ika.

⁴ Ak Ihova, namu ehvaig ehelek nopan mas unyak aiek, im niji adiat irak, mika inyi ehed; va ekpu ato nauatialidi unyak ainyak.

⁵ Im lep inig, as ika aiek yi idivaig nasjaaicnaig irai ikma atimi niji adiat irak; et lep idivaig intakj itai niji mesese irak an nuhup unyum: era idim takitai natimi asega v et wat esjilid nemda ura. Sila.

⁶ Era idivaig nalmui itai natimi an natga ura: et ehioehio inliin mopora ara vai intakitai: era ikni o itai ara, jam eti ato atimi iji ig eri ohuun ara.

⁷ Ak Natimarid, ek aitgaig inhe ainyak? ek aitgaig euc ainyak,

⁸ Namu imiatamaig nyak aiek va nedo has asega unyak; namu jim ati nyak aiek mika eri atuh nyak a ilpu atimi ahnag.

⁹ Ekpu eucsup ainyak; ekpu eti tas ainyak; vaig inig nikavaig,:, as ago nedo inigki aiek.

¹⁰ Namu atipagki nitai ated nyak unyum aiek; ek auatialidi ainyak va nauud nyak u nikmam.

¹¹ Na ahugni atimi aiek an nedo aredei unyum va nedo has ura, ja par atiih niji itai merit ura et idivaig nages an napelumai; era idim takitai natimi asega. Sila.

¹² Ak Ihova, namu atahaijeg intas alaigaheni unyak aiek, um atgeig pam intikgam va nahlaig unyak; namu jim eucsup aiek, eku wit taig ainyak; ek atimi an taka pece ainyak an nuhup unyum, um atimi amen ehcid et idivaig ilpu retpok asega.

¹³ Namu yiaspan an taka uarin aiek vai nyak, mika yi lep upene inliinmopok ainyak, ek wat eti fi atga ainyak um ti.