Saam 38 - Intas Etipup

SAAM 38.

Et taig tas ehele Atua a Tevit mika yi aiheuc vai yin aien an namen has o un.

¹ AK Ihova, namu jim ated nyak aiek an nedemda unyum; um jim aredei nyak an tavaitap alupas unyum.

² Et mun idim ahcai nyak niji efana unyum, et lep ehtipidai nyak nikmam.

³ Et eti cehcehe tah inuarin nohuk va nedemda unyum; et lep eti eropse niji eduok va nedo has unyak.

⁴ Et mun idim ahlaujai an nidjinik nedo has unyak: ek auatialidi ainyak napol vaig et idivaig nitai ahelwei opoc.

⁵ Et epiv um makmak inmacop irak, va nedo ahnag unyak.

⁶ Ek oplec has ainyak; ek acvacva alupas ainyak; ek taig ainyak an nadiat asega.

⁷ Et idim esjilid acen nihlup an nipjinetgak: et eti lep cehcehe tah inuarin nohuk.

⁸ Ek areci ainyak, um oplecoplec alupas nohuk: kis aunyauwaig ainyak va nohocred u inliinmopok.

⁹ Ak Natimarid, na ato inmerit asega unyak aiek; er lep eti adenaig vai euc naunyauwaig unyak.

¹⁰ Ek mopmop ainyak, et ti nemda unyak; et lep apat nesganimtak ainyak.

¹¹ Era aiji itac acen vai nemehe irak a ilpu etwak im ilpu apa unyak; era lep aiji itac acen a ilpu atimi ehpan irak.

¹² Era ana irai opoig vai nyak ara sji igki, era ika ara ki mas ainyak: era asan tas has ara sji igki, era merit ara nago vaig nedo has vai nyak; erupu aktaktai nedo efaifa ara ira adiat asega.

¹³ Ja, ek idivaig natimi ucjipines intikgan ainyak, um eti ahgei itai; ek lep idivaig natimi pop ainyak, et eti tas aien.

¹⁴ Kis idim idivaig natimi eti ahgei itai ainyak; et lep eti ahes an nipjineucsen tah intas ated atimi.

¹⁵ Ak Ihova, ek idim aitgai euc ainyak: ak Natimarid Atua unyak, napu atahaijeg intas unyak aiek.

¹⁶ Kis idim ika ainyak, Erumu jim imiacitak ara vai nyak; is wat wohyiat neduok, is ijinies inliinmopora ara vai nyak.

¹⁷ Ek idim ika ainyak, Ekpu atga adjo ainyak, ek lep taigtaig ainyak irai iji adiat.

¹⁸ Ekpu idim asuptecnaig nedo acalacal unyak ainyak; ekpu k p ohocred va nedo has unyak ainyak.

¹⁹ Era emda a ilpu atimi tak atimi irak, um edemda: era lep ahinag ara sji igki, era ispara amcel vai nyak ara.

²⁰ Era lep edemda vai nyak ara sji igki, era aru nedo upene ara an nedo has; va nedo unyak, nikavaig, ek apol an nedo upene ainyak.

²¹ Ak Ihova, namu jim udei nyak aiek: ak Atua unvak, namu jim amen itac acen vai nyak aiek.

²² Auroauro um atau imi nyak, ak Ihova, na atimi imiatamaig nyak aiek.