Saam 37 - Intas Etipup

SAAM 37.

Et asuptecnaig intas a Tevit, um ika, eri jim ipjiecek, jam asgeig ira Atua, vaig inig nikavaig, et eche namen u ilpu atimi upene im namen u ilpu atimi auatatimi.

¹ NAMU jim edemda aiek va namen u ilpu atimi auatatimi, um jim auatitai va namen upene u ilpu atimi ago nedo has.

² Uhpu auroauro um ucsei ra et idivaig nomotmot; erupu lep imlai ara et idivaig nefelelicai et tup pam eteuc.

³ Namu asgeig irai Ihova aiek, um ago nedo upene; namu amen an pece aiek, um imiisjis ninveijec.

⁴ Namu imiacitak ihova aiek; etpu lep alupai euc inmerit u inliinmopom aien.

⁵ Namu atijai nitai apos unyum aiek irai Ihova, um lep asgeig iran; etpu ago nauritai unyum aien.

⁶ Etpu ehvaig nedo atoh unyum aien, et idivaig inlah; im nedo upene unyum, et idivaig nadiatadiat.

⁷ Namu eucsup aiek vai Ihova, um tup eklim aitgai yin; namu jim edemda aiek vaig tah et ahinag niji itai o un, im lep natimi inig et aktaktai nauritai has o un aien.

⁸ Namu jim edemda aiek, um jim atavaitap; um jim ehniv, va an jim ago tah nedo has aiek.

⁹ Uhpu idim auahas ehni ilpu atimi ago nedo has; ja erupu ohuun inpece ara sji igki era aitgai Ihova ara.

¹⁰ Erupu auroauro um tiih a ilpu atimi auatatimi; napu almoi upene niji uarin amen ura aiek, ja etpu ti.

¹¹ Ja erupu ohuun inpece a ilpu atimi upoupo; erupu lep imiacitak niji itai upene et ahinag ara.

¹² Era aktaktai itai has vai ilpu atimi upene a ilpu atimi auatatimi, um ataktit neijira vai ra.

¹³ Etpu imilaav ra a Natimarid; vaig inig nikavaig, et ato aien mika, etpu yetpam nadiat ura.

¹⁴ Era mun ahyausei nauitoga ura a ilpu atimi auatatimi, um aiyihi inceen nefana ura, par auhaigse ilpu atimi ohocred im ilpu ihki atimi, um lep atgei ilpu atimi iji ig et atoh nedo ura.

¹⁵ Etpu yetpan nauitoga ura iraili mopora; uhpu lep asvi inceen nefana ura.

¹⁶ Et esjilid naga tintin o un tah natimi upene ira aga alupas u ilpu atimi auatatimi et ahinag.

¹⁷ Uhpu idim asvi nikmai ilpu atimi auatatimi: ja et asjiraig jai ilpu atimi upene a Ihova.

¹⁸ Et ato niji adiat u ilpu atimi upene a Ihova; etpu lep amen niji itai ura irai iji mesese.

¹⁹ Erupu eti ehcamai ara an nopan ohocred: erupu lep geije ara an nopan umlaig has.

²⁰ Erupu idim emesmas a ilpu atimi auatatimi; erupu atiih a ilpu atimi edemda vai Ihova et idivaig nagako irai hakli siip er atnamud; erupu atiih ara et idivaig nadran cap.

²¹ Era ugyi itai a ilpu atimi auatatimi, jam eti aru: ja era tup aiheuc va atimi a ilpu atimi upene, um alupai ra itai.

²² Erupu idim ohuun inpece ara sji igki, et asan tas acis yi alwai ra a Atua; ja uhpu auahas ehni ra sji igki, et asan tas ahlaijaig vai ra aien.

²³ Et ika a Ihova eri atga atoh a ilpu atimi upene: et lep imiacitak namen ura aien.

²⁴ Eru wit epihtau ara, erupu eti eropropse ara: et idim asjiraig jai nikmara a Ihova.

²⁵ Kis takuras ainyak, ek mun lep efatimi ainyak; jai kis eti ecet ainyak ilpu atimi upene eris atcijaig ra, ka ilpu hal ura eris ugyi nitai caig ara.

²⁶ Era aiheuc vai atimi ara irai iji adiat, um lep alupai ilpu ihki atimi itai; era mun ahesmoij a ilpu hal ura.

²⁷ Udei nedo has, um ago nedo upene, um amen irai iji mesese.

²⁸ Et idim merit vai nedo atoh a Ihova, et lep eti udei ilpu atimi upene o un aien; et aminjinai ra aien irai iji mesese: ja uhpu auahas ilpu mapoi ilpu atimi auatatimi.

²⁹ Erupu ohuun inpece a ilpu atimi upene, um amen iran irai iji mesese.

³⁰ Era asan tas arapakau a ilpu atimi upene, era lep asuptecnaig nedo atoh ara.

³¹ Et amen intas alep o Atua an liinmopora; erupu lep eti ahnag ara.

³² Era imiiris ilpu atimi upene a ilpu atimi auatatimi, um ika eri atgei ra.

³³ Inyi eti udei ra a Ihova mika eri auahas ra: etpu eti atcijai ra aien, uhu wit tas alep vai ra.

³⁴ Namu aitgai Ihova aiek, um apos nedo o un, etpu lep imiatidai euc aien par ohuun inpece: uhu wit auahas ilpu atimi auatatimi, napu ecetai aiek.

³⁵ Kis ecet ilpu atimi auatatimi ainyak, is alupas nemda ura, eris rau ara et idivaig incai et umoh an nuarin amen o un.

³⁶ Ja eris tiih pan ara; maiya, eris idim atiih ara: kis idim ahilek ra ainyak, jam eti ecet ra.

³⁷ Almuktit ilpu atimi upene, um alum ilpu atimi inveijec: erupu amen upene a ilpu atimi igpa.

³⁸ Ja uhpu ehras auahas ilpu atimi auatatimi: uhpu auahas namen upene u ilpu atimi auatatimi.

³⁹ Ja et imiatamaig ilpu atimi upene a Ihova: et imiaras ra aien an nopan ohocred ura.

⁴⁰ Etpu lep atau imi ra a Ihova, um imiatamaig ra: etpu imiatamaig ra aien vai ilpu atimi auatatimi um imiatumumoh ra, vaig inig nikavaig, era asgeig iran ara.