Saam 33 - Intas Etipup

SAAM 33.

1 Eris idim, ika eri imiahpas Atua va nedo upene o un, 6 im nemda o un, 12 im lep va nedo o un par aminjinaig atimi. 20 Et upene va atimi par asgeig ira Atua.

¹ AKUMU imiacitak Ihova aijaua, ak ilpu atimi upene: et upene eri imiahpas yin a ilpu atimi et atoh asega nedo ura.

² Akumu imiahpas Ihova aijaua irai harp; um acesaces nohranitai vai yin irai saltere et amen inya et ten iran.

³ Akumu acesaces nohranitai vai yin aijaua an nohranitai mat; akumu atcei upene harp aijaua, um ahlaig ijinies.

⁴ Et idim upene intas upyi asaig u Ihova; et lep ehneijid aien an niji auritai asega, o un.

⁵ Et merit aien va nedo upene im nedo atoh: et ohua nedo aiheuc u Ihova an nobohtan.

⁶ Is ago nohatag a Ihova an tas o un; im lep niji itai asega amen iran an nohran nipjineucsen.

⁷ Et asjapicnaig injap aien, et idivaig nobohtan er assijai; et lep ati intupahuahau aien irai uarin ikni itai iran,

⁸ Erumu imtitai Ihova natimi asega an nobohtan: erumu eucjeucjeucaij vai yin a nup urai iji pece asega.

⁹ Aien aigki is tas aien, ja is par eteuc niji itai; aien aigki is asaig aien, ja is par amen aktit niji itai.

¹⁰ Et auahas naktaktai u inliinmopoi nup urai iji pece a Ihova; et mun lep ika aien yi takitai intas jipe u atimi.

¹¹ Et amen aktit intas o Ihova um yetpan irai iji adiat; im naktaktai u inliinmopon um yetpan irai iji mesese asega.

¹² Era mun ahesmoij a nup uran pece inig et Atua ura a Ihova; im natimi iji igki is ikni ra aien, mika eri ilpu atimi o un ara.

¹³ Et amen an nohatag a Ihova, um almaijidjid; et alum atimi asega aien.

¹⁴ Is ateuc an nimnim o un aien, um amah ira ra asega eris amen an nobohtan ara.

¹⁵ Et ago inliinmopora asega aien; et lep ato niji auritai asega ura aien.

¹⁶ Er eti imiatamaig ilpu atimarid vai ilpu eucsupo ura et ahinag: er lep eti imialep ilpu atimi emda va nemda esjilid ura.

¹⁷ Et takitai hors par imiatamaig atimi; eri eti imiatamaig atimi ara an nemda esjilid ura.

¹⁸ Et idim almaijidjid ra a Ihova era imtitai yin ara, im lep ra era aitgaig naiheuc o un ara:

¹⁹ par imialep ra vai inmas, um ika eri umumoh ara an nopan uni-laig has.

²⁰ Et aitgai Ihova inliinmopja akaija: et atau imi caija aien, um aibuthan caija.

²¹ Etpu idim imiacitak yin inliinmopja akaija; nikavaig, inta idim asgeig au nidan itap akaija.

²² Ak Ihova, etmu amen naiheuc unyum ehelema, et idivaig ecra aitgai euc aijama.