Saam 32 - Intas Etipup

SAAM 32.

1 Era mun ahesmoij ara eris atipagki neruvaig nedo has ura. 3 Et igpa inliinmopora ara era asuptecnaig nedo has ura ara ehele Atua. 8 Et imiacitak inliinmopora ara era leh intas upyi asaig u Atua ara.

¹ ET mun ahesmoij a natimi inig eris atipagki neruvaig nedo imipalea o un, um lep adahpoi nedo has o un.

² Et mun ahesmoij a natimi inig et eti atijai iran nedo acalacal o un a Ihova, um ti nefaifa u inliinmopon.

³ Kis idim eti tas ainyak, is auhalauhal niji eduok an naunyauwaig unyak an nadiat asega.

⁴ Et idim ehtipidai nyak nikmam ira adiat im nepig: et tiih nemda unyak va nohocred et idivaig nihlup an lidija. Sila.

⁵ Kis ika ainyak, Ekpu asuptecnaig nedo has unyak ainyak ehelum, kis lep eti ateri nedo acalacal unyak ainyak. Kis ika ainyak, Ekpu asuptecnaig nedo imipalea unyak ehele Ihova ainyak; as eti lep imiehva neruvaig nauatatimi unyak aiek. Sila.

⁶ Va nitai inigki, erupu ago nalaigaheni vai euc a ilpu atimi upene asega an nopan inig uhpu ecet euc: etu wit ahgarero alupas inwai, inyi idim eti uhum pan ra.

⁷ Nai uarin adenaig unyak aiek; napu imicoho nyak aiek va nohocred; napu imiarehed nyak aiek irai ohranitai va nimiatamaig nyak unyum. Sila.

⁸ Ekpu esege imi caua ainyak, ak ilpu atimi upene, um asuptecnaig ehelemia nefalaig inig akupu atga iran aijaua: ekpu aminjinaig caua ainyak an nesganimtak.

⁹ Akumu jim idivaig hors aijaua, ka myul, et ti lelra ara: er yecrei nipjieucsera irai bit im braitel, nikavaig, era eti ispara imjijeuc iramia ara.

¹⁰ Et ahinag nohocred u ilpu atimi auatatimi: ja etpu imiarehed ilpu atimi asgeig iran au naiheuc o un a Ihova.

¹¹ Akumu imiacitak Ihova aijaua, um cediaig, ak ilpu atimi upene: akumu lep acesaces nohranitai aijaua, um imiacitak, ak ilpu atimi asega et inveijec inliinmopomia.