Saam 31 - Intas Etipup

SAAM 31.

1 Et ika a Tevit et asgeig ira Atua aien; et lep ugyi Atua aien mika yi atau imi yin. 7 Et imiacitak aien va naiheuc o un. 9 Et alaigaheni aien an nohocred o un. 19 Et imiahpas Atua aien va nedo upene o un.

¹ AK Ihova, ek mun asgeig iram ainyak; ekmu jim ehcamai ainyak irai iji mesese; namu imiatamaig nyak aiek an nedo atoh unyum.

² Namu atgeig pam intikgam ehelek aiek; namu auroauro aiek um imiatamaig nyak: namu hehteuc emda unyak aiek, im neom atpuh iran par imiatamaig nyak.

³ Na idim hehteuc unyak aiek im neom ipjin unyak; va nitai inigki, namu aminjinaig nyak aiek, um atau irak va nidam.

⁴ Napu apijadi nyak aiek an nopoig; eris adenaig par anai nyak iran ara, jam eti asaig: nai idim emda unyak aiek.

⁵ Ekpu ati nyak an nikmam ainyak: na mun auanimtak aiek, ak Ihova Atua inveijec.

⁶ Ek amcel vai ra ainyak era asgeig irai ilpu atmas ara; ja ek asgeig irai Ihova ainyak.

⁷ Ekpu imiacitak ainyak um cediaig va naiheuc unyum: na mun almoi nerekinman irak aiek; as lep ato nohocred u inliinmopok aiek;

⁸ na mun lep eti atcijaig pan nyak aiek ehele ilpu atimi edemda vai nyak: na mun ati neduok aiek an nuarin lah.

⁹ Ak Ihova, namu aiheuc vai nyak aiek, ek idim ohocred ainyak: et auatialidi nesganimtak, im inliinmopok, im lep nohuk vai intaig unyak.

¹⁰ Ek idim ohocred ainyak irai iji adiat, um taig irai iji mesese: et tiih nemda unyak va nedo has unyak, et lep auhalauhal niji eduok.

¹¹ Eris asan tas has vai nyak a ilpu atimi edemda vai nyak asega, jam asan tas has esjiiid a ilpu etwak; eris lep imtitaig nyak a ilpu apa unyak; eris aha vai nyak a ilpu atimi ecet nyak an nefalaig.

¹² Eris ahnag irak ara et idivaig natimi mas er eti imiehva yin; kis idivaig nipjinitai ahtagrei ainyak.

¹³ Kis idim atahaijeg intas has u atimi is ahinag ainyak: is arehed irak niji itai er imtitaig vaig: eris asaig jipe intas alwai nyak ara, um ika eri atgei nyak.

¹⁴ Jai kis asgeig iram ainyak, ak Ihova; kis ika ainyak, Na Atua unyak aiek.

¹⁵ Et amen nitai umoh iran unyak an nikmam; namu imiatamaig nyak aiek vai ilpu atimi tak atimi irak, im lep vai ra era atmas vai nyak ara.

¹⁶ Etmu lah nesganimtam aiek vai naheca unyum: um imiatamaig nyak an naiheuc unyum.

¹⁷ Ak Ihova, ekmu jim ehcamai ainyak: nikavaig, kis ahlaig vai euc ainyak: erumu ehcamai a ilpu atimi auatatimi, erumu lep eucsup ara anliin nehpanitai.

¹⁸ Erumu jim tas a ilpu atimi asan tas ahcil an nipjineucsera; era asan tas ahcil ara vai ilpu atimi upene an liinmopora ijinies im inliinmopora edemda.

¹⁹ Et esjilid acen nitai upene iji igki, as ikni aiek vai ra era imtitai euc ara: as lep ehvaig aiek an nuhup u atimi vai ra era asgeig iram ara.

²⁰ Napu adenai ra aiek an nuarin adenaig an nuhup unyum van tas alwai ra u atimi: napu adenaig ra aiek an naiyu unyum van tas imiisjis itai sjipe u atimi.

²¹ Naaurinig vai Ihova: is idim ika aien yi esjilid acen nedo aiheuc o un vai nyak an maliyum emda.

²² Kis idim ika ainyak an nehioehio o inliinmopok, Er atcijaig nyak an nuhup unyum: ja as atahaijeg intas ugyi unyak aiek an nahlaig unyak vai euc.

²³ Ak ilpu atimi upene o un asega, etmu aiyu inliinmopomia aijaua vai Ihova: et aminjinaig ilpu atimi inveijec a Ihova, jam aru alupas irai ilpu atimi ago nedo ijinies.

²⁴ Ak ilpu atimi aitgai Ihova asega, akumu jim auatialidi aijaua, etmu ati aktit inliinmopomia aien.