Saam 28 - Intas Etipup

SAAM 28.

1 Et ugyi Atua a Tevit mika yi aat irai ilpu atimi tak atimi iran. 6 Et imiahpas Atua aien. 9 Et alaigaheni va atimi aien.

¹ AK Ihova inhehteuc unyak, ekpu ahlaig vai euc ainyak; namu jim eucsimrig vai nyak aiek; el et eucsimrig vai nyak aiek, ekpu idivai ra sji igki ainyak era asuol anliin nehpanitai ara.

² Namu atahaijeg intas ugyi unyak aiek, eku wit ahlaig vai euc ainyak, um adaig jai nikmak an nuarin itap unyum.

³ Namu jim aihiaig pan nyak aiek, yi tup ethi ache pan irai ilpu atimi ago nedo has, im ilpu atimi auatatimi, era tas igpa enele ilpu etwara ara, ja et aktaktai has inliinmopora ara.

⁴ Namu alupai ra neruvaig aiek et idivaig nauritai ura, um lep idivaig nedo has ura: namu alupai ra neruvaig aiek et idivaig itai eris ago ara; etmu idivaig nedo ara nimtan imi ra.

⁵ Era eti aktaktai nauritai u Ihova ara, im nitai iji igki is ago aien an nikman; va nitai inigki, etpu auahas ra aien, um eti imiatamaig ra.

⁶ Naaurinig vai Ihova, is idim atahaijeg intas ugyi unyak aien.

⁷ Et atimi emda unyak a Ihova, um itai atapin nyak; is asgeig iran inliinmopok ainyak, is lep atau imi nyak aien: etpu idim imiacitak alupas inliinmopok ainyak; ekpu lep imiahpas yin ainyak an nohranitai unyak.

⁸ Et atimi emda ura a Ihova, et lep emda aien par imiatamaig yin is ati yin aien.

⁹ Namu imiatamaig ilpu atimi unyum aiek, um asan tas acis ji alwai ilpu atimi as lucsei ra aiek; namu lep alaa ra aiek, um imiaridjai ra irai iji mesese.