Saam 27 - Intas Etipup

SAAM 27.

1 Et ago emda nimiisjis ninveijec o un a Tevit an nemda u Atua, 4 im naiyu u inliinmopon va nauritai u Atua, 9 im lep an tas alaigaheni o un.

¹ ET itai lah unyak a Ihova, um atimi imiatamaig nyak; ekpu imtitai di ainyak? et imicoho emda nyak a Ihova; ekpu eucjeucjeucaij vai di ainyak?

² Eris wat asjapicnaig um aat irak a ilpu atimi auatatimi, ilpu atimi edemda vai nyak marom, im ilpu atimi amcel vai nyak, par auahas nyak, eris epihtau ara um eropropse.

³ El era asjapicnaig um aat irak a ilpu eucsupo et ahinag, inja eti imtitaig inliinmopok ainyak; el era ati nedoa vai nyak ara, ekpu amen upene ainyak va nedoa iyehki.

⁴ Ek mun ugyi nitai et ethi ainyak ehele Ihova, ekpu lep ahilek nitai inigki ainyak; mika ki amen ainyak anliin neom o Ihova irai iji adiat au numoh unyak, um almoi nesganimtai Ihova, um ahodai itai an neom itap o un.

⁵ Etpu idim adenaig nyak aien an naiyu o un au nopan ohocred unyak; etpu adenaig nyak aien an nuarin adenaig anliin neom itap o un; etpu ati nyak ijinies an hehteuc aien.

⁶ Im lep inig, uhpu alcacsei nidjinik, mika ki esjilid ainyak nai ilpu atimi tak atimi irak, era arehed irak ara; ekpu lep ahlap ainyak an neom itap o un, um imiacitak; ekpu acesaces nohranitai ainyak vai Ihova um imiahpas yin.

⁷ Ak Ihova, namu atahaijeg intas unyak aiek; ekpu ahlaig vai euc ainyak an nohrak: namu lep aiheuc vai nyak aiek um adai intas unyak.

⁸ A s wat ika aiek, Akumu ahilek nesganimtak aijaua; is ika inliinmopok ainyak ehelum, Ak Ihova, ekpu ahilek nesganimtam ainyak.

⁹ Namu jim adenaig nesganimtam aiek vai nyak; jim ahtahlo naheca unyum aiek an nedemda unyum: as atau imi nyak aiek; namu jim udei nyak aiek, um jim amen itac acen vai nyak, ak Atua imiatamaig nyak.

¹⁰ Eru wit udei nyak a etmak im risik, etpu idim aminjinaig nyak a Ihova.

¹¹ Ak Ihova, asjaaicnaig ehelek aiek an nefalaig unyum, um atau irak an nefalaig atoh unyum, vai ilpu atimi tak atimi irak.

¹² Namu jim atcijaig pan nyak aiek van merit u ilpu atimi edemda vai nyak: era mun idim atidai vai nyak a ilpu atimi asuptecnaig intas ahcil, im ilpu atimi merit par atgei atmas.

¹³ El ekis eti ika ainyak, ki almoi nedo aiheuc u Ihova ainyak an nobohtan era umumoh natimi iran, el ekis auatialidi ainyak.

¹⁴ Namu aitgai Ihova aiek: etmu jim auatialidi inliinmopom aiek; etmu ago emda inliinmopom aien: namu aitgai Ihova aiek.