Saam 26 - Intas Etipup

SAAM 26.

Et apan ehele Atua a Tevit, um imiisjis ehelen va nedo inveijec o un.

¹ AK Ihova, namu ago nedo atoh vai nyak aiek; ek mun atga an nedo atoh unyak ainyak: ek mun lep asgeig irai Ihova ainyak; inki eti wuhyilyik ainyak.

² Ak Ihova, namu ahilek inliinmopok aiek, um ato nyak; namu ahilek upene inliinmopok aiek im naktaktai unyak.

³ Et eteuc naiheuc unyum an nuhup unyak; ek mun lep atga ainyak an tas inveijec unyum.

⁴ Ek mun eti amen ainyak ehele ilpu atimi asan tas ahcil; inki eti lep ehredo ainyak im ilpu atimi efaifa.

⁵ Ek mun amcel vai ilpu atimi ago nedo has ainyak; inki eti amen ainyak ehele ilpu atimi ago nedo maumau.

⁶ Ekpu yiri nikmak ainyak, etpu lep inveijec inliinmopok: ja par apan u natau unyum, ak Ihova:

⁷ mika ki asan tas naaurinig ainyak, um asuptecnaig nauritai imiali asega unyum.

⁸ Ak Ihova, ek merit ainyak vai nuarin inig et amen iran neom unyum, im lep nuarin inig et amen iran natimi alupas unyum.

⁹ Namu jim ati nesgak aiek ehele ilpu atimi auatatimi, im nitai umoh iran unyak ehele ilpu atimi atgei atmas:

¹⁰ era ago nedo has irai ikmara ara; et lep ohua nimtan nedo efaifa ura an matara.

¹¹ Ja ekpu idim atga an nedo atoh unyak ainyak: namu imicoho nyak aiek, um aiheuc vai nyak.

¹² Et amen aktit neduok ainyak an nuarin marara: ekpu imiahpas Ihova ainyak ira asjapicnaig u atimi.