Saam 25 - Intas Etipup

SAAM 25.

1 Et imiisjis ninveijec intas o Atua a Tevit an nalaigaheni o un. 7 Et ugyi Atua aien mika yi ohpodohpod nedo has o un, 16 um atau iran an nohocred o un.

¹ AK Ihova, etpu aridjai inliinmopok ainyak ehelum.

² Ak Atua unyak, kis mun asgeig iram ainyak, inki eti ehcamai ainyak; erupu eti esjilid irak a ilpu atimi tak atimi irak.

³ Im lep inig, erupu idim eti ehcamai ara sji igki asega era aitgaig euc ara: erupu ehcamai ara sji igki era ispara ago nedo efaifa ara.

⁴ Ak Ihova, namu asjaaicnaig ehelek aiek irai efalaig unyum; esege imtak nedo unyum.

⁵ Namu atau irak aiek an nedo inveijec unyum, um esege imtak; nai idim Atua imiatamaig nyak aiek; ek aitgai euc ainyak an nadiat asega.

⁶ Ak Ihova, namu imiehva nedo aiheuc unyum aiek, im nedo upene unyum; as idim ago aiek itu acen um imihum pam an nopan inig.

⁷ Namu jim imiehva nedo has unyak aiek an takuras unyak, im nedo imipalea unyak; namu imiehva nyak aiek, ak Ihova, et idivaig naiheuc unyum im nedo upene unyum.

⁸ Et ago nedo upene a Ihova im nedo atoh: va nitai inigki, etpu atau irai ilpu atimi ago nedo has aien an nefalaig o un.

⁹ Etpu atau irai ilpu atimi upoupo aien an nedo atoh; etpu lep asjaaicnaig imi ilpu atimi upoupo an nefalaig o un aien.

¹⁰ Et upene um inveijec nedo asega u Ihova vai ra sji igki era imiaiji intas etipup o un ara im intas alep o un.

¹¹ Ak Ihova, namu iknipagki nedo has unyak aiek va nidam; et idim esjilid nedo has unyak.

¹² El et eteuc tah et imtitai Ihova aien, etpu atau iran aien an nefalaig inig et merit vaig aien.

¹³ Etpu amen upene aien; erupu lep ohuun inpece a ilpu mapon.

¹⁴ Et amen a Ihova ehele ra sji igki era imtitai yin ara; etpu asan tas etipup o un ehele ra aien, mika eri ato itai ara.

¹⁵ Ek amah irai Ihova ainyak irai iji adiat; vaig inig nikavaig, etpu atipagki neduok aien an nopoig.

¹⁶ Namu aihidai euc pam ehelek aiek, um aiheuc vai nyak; ek idim echim amen ainyak um ohocred.

¹⁷ Et ahinag nohocred u inliinmopok ainyak: namu imiatamaig nyak aiek va niji ohocred unyak.

¹⁸ Namu almoi nohocred unyak aiek im nehioehio u inliinmopok, um iknipagki nedo has asega unyak.

¹⁹ Namu almoi ilpu atimi tak atimi irak aiek; era idim ahinag ara; era amcel vai nyak ara um ehcerucai nyak.

²⁰ Namu aminjinaig nyak aiek, um imiatamaig nyak; inki eti ehcamai ainyak: vaig inig nikavaig, ek mun asgeig iram ainyak.

²¹ Uhpu imiatamaig nyak va nedo inveijec im nedo atoh unyum; ek idim aitgai euc ainyak.

²² Ak Atua, namu imiatamaig nup Isreel aiek, va niji ohocred asega ura.