Saam 22 - Intas Etipup

SAAM 22.

1 Et asan ehti a Tevit an namen has o un. 9 Et alaigaheni aien an nohocred alupas o un. 23 Et imiahpas Atua aien.

¹ AK Atua unyak, ak Atua unyak, na a uri aiek par udei nyak? na a uri aiek par amen itac acen um eti imicoho nyak, um eti atahaijeg naunyauwaig unyak?

² Ak Atua unyak, ek ahlaig ainyak an nadiat, ja na eti atahaijeg aiek; im lep an nepig, ja na eti adai intas unyak aiek.

³ Nai idim itap aiek, era lep imiahpas euc a nup Isreel.

⁴ Eris asgeig iram a ilpu retpoma: eris asgeig iram ara, as lep imiatamaig ra aiek.

⁵ Eris ahlaig vai euc ara, as imicoho ra aiek: eris asgeig iram ara, jam eti ehcamai.

⁶ Ja ek tup emijan ainyak, um eti atimi: era atuh nyak natimi, era lep amcel vai nyak a nup uran pece unyak.

⁷ Era imiafakahcil nyak ara asega era alum nyak ara: era lep ahuumpik vai nyak ara, um auhohoig nidjinira, ika,

⁸ Asgeig irai Ihova; etpu imicoho yin aien: etpu imiatamaig yin aien; nikavaig, et idim imiacitak yin aieu.

⁹ As idim atipagki nyak aiek an nipjinetgai risik: as lep aminjinaig nyak aiek, is wat alidak a risik.

¹⁰ Eris atcijaig nyak pan iram ahes an nopan apos nyak um imihum pani: as Atua unyak aiek an nopan iyehki eris eti fi apos nyak, um imihum pam an nopan inig.

¹¹ Namu jim amen itac acen vai nyak aiek: et idim ubutpotet pam ehelek nohocred; et lep eti eteuc tah par atau imi nyak.

¹² Era mun arehed irak kurimatau atamaig et ahinag: era mun lep ahtag mak kurimatau atamaig emda an pece Besan.

¹³ Era mun asalgei nipjineucsera ara vai nyak, et idivaig laion et cesji oplecoplec itai um aunyauwaig.

¹⁴ Er atladwi nyak et idivaig inwai, et lep esjiliek niji eduok asega: et idivaig nasancai inliinmopok ainyak; et ahga anliin nipjinetgak.

¹⁵ Et mese nemda unyak et idivaig nuarin nipjinitai obohtan; et apol namak an nipjineucsek; napu ati se nyak anliin nehpanitai aiek.

¹⁶ Era mun arehed irak kuri: era mun atkapidjiu nyak a ilpu atimi auatatimi: era ahcai nikmak ara im neduok.

¹⁷ Ek esvi niji eduok asega ainyak: era wat alum nyak ara um ahaktit irak.

¹⁸ Era ahaig napelumai unyak ira ra ara, um edaig jipe niji itai asjaaicnaig, par ato natimi inig etpu leh nitai aso nyak aien.

¹⁹ Namu jim amen itac acen vai nyak aiek, ak Ihova; namu auroauro aiek um atau imi nyak, ak natimi emda unyak.

²⁰ Namu imiatamaig nyak aiek va natimi atgei atmas, im lep va nemda u natimi inig et idivaig kuri aien; ek echim amen ainyak.

²¹ Namu imiatamaig nyak aiek va nipjineucse laion: as lep imicoho nyak aiek va nipat u kurimatau aleg.

²² Ekpu asuptecnaig nidam ainyak ehele ilpu etwak: ekpu imiahpas euc ainyak an nasjapicnaig u atimi.

²³ Akumu imiahpas Ihova aijaua, ak ilpu atimi ecen vai yin; akumu acesaces nohranitai vai yin aijaua asega, ak ilpu mapoi Jekob; akumu imtitai yin aijaua asega, ak ilpu mapoi Isreel.

²⁴ Et mun idim eti esjum vai nohocred u natimi ohocred aien, um eti amcel vai yin; is lep eti adenaig nesganimtan aieu vai yin, ja is wat ahlaig vai yin aien is atahaijeg aien.

²⁵ Ekpu imiahpas euc ainyak an nasjapicnaig alupas u atimi: ekpu ehneijid intas upyi asaig unyak ainyak an nuhup u ra sji igki, era imtitai yin ara.

²⁶ Erupu hag an nopan iyehki a ilpu atimi upoupo um geije: erupu imiahpas Ihova ara sji igki era ahilek yin ara: etmu umoh inliinmopomia aijaua irai iji mesese.

²⁷ Erupu imiehva nitai iji igki natimi asega era amen irai tid an nobohtan ara, um adumoij pan ehele Ihova: erupu lep ago nalaigaheni an nuhup unyum a nup urai iji pece asega.

²⁸ Et idim ohuun nelcau a Ihova: et lep atimarid aieu irai nup urai iji pece.

²⁹ Era mun hag um ago nalaigaheni ara asega era esjilid an nobohtan ara: erupu atpuse an nuhup o un ara asega era asuol anliin nobohtan ara: im lep aien, et elika vai yin par ika yi umoh aien.

³⁰ Erupu aheca o un natimi an taka opan; uhpu asuptecnaig vai Natimarid ehele ilpu atimi isjeupigmoig ra.

³¹ Erupu apan ara um asuptecnaig nedo atoh o un ehele atimi an taka opan, mika is ago nedo inigki aien.