Saam 2 - Intas EtipupSAAM 2. 1 Intas va nelcau u Kristo. 10 Er ated ilpu atimarid mika eri leh intas o un. 1 ERA a uri a nup urai elcau par ehtauo, era lep a uri a nup urai pece par aktaktai intakitai? 2 Era atidai a ilpu atimarid an nobohtan, era lep tas jipe a ilpu atimi alupas, um aat irai Ihova, im lep vai yin is ati yin aien, um ika, 3 Intumu atgeig yi amud inwau urau akaija, um erekhaig pan jaula urau eheleija. 4 Etpu laav aien et ateuc an nohatag aien: etpu imiafakahcil ra a Natimarid. 5 Etpu lep tas tavaitap ehele ra aien, um ika yi ehioehio inliinmopora ara va nedemda alupas o un. 6 Jai kis ati natimarid unyak ainyak ijinies u Saion, nedoon itap unyak. 7 Ekpu asuptecnaig intas alep ainyak: is ika ehelek a Ihova, Nai Hal unyak aiek; ek mun apos euc ainyak an nadiat inigki. 8 Namu ugyi nyak aiek; ja ekpu alupai euc nup urai iji pece ainyak, mika eri unyum, im lep nobohtan asega mika an ohuun aiek. 9 Napu auud yi oplecoplec ra aiek an nelop hat; napu auhoig yi agrei ra aiek, et idivaig nipjinitai er ago an tan apol. 10 Va nitai inigki, akumu arapakau aijaua, ak ilpu atimarid: im lep inig, akumu aktaktai aijaua, ak ilpu atimi alupas an nobohtan. 11 Akumu imtitai Ihova aijaua, um atpuse an unhup o un; akumu lep imiacitak aijaua um eucjeucjeucaij. 12 Akumu aijumnyi Inhal o un aijaua, vai yi jim edemda aien; im lep inig, akupu emesmas aijaua an nefalaig has unyimia; etpu idim auroauro um ere intavaitap o un. Era mun ahesmoij ara asega era asgeig iran ara. |
Vanuatu Bible (Intas Etipup) © United Bible Societies, 1863, 2019.
United Bible Societies