Saam 19 - Intas Etipup

SAAM 19.

1 Et ehvaig natimi alupas u Atua nitai iji igki is ago aien. 7 Et asuptecnaig naiheuc u Atua Intas itap o un. 12 Et ugyi Atua a Tevit mika yi aiheuc vai yin aien.

¹ ET ehvaig natimi alupas u Atua nohatag: et lep asuptecnaig nauritai an nikman nauanohatag.

² Uhpu asan tas alupas vaig irai iji adiat, uhpu lep ehvaig narapakau o un irai iji epig.

³ Et ti nipjineucsera, um ti intas ura, er lep eti ahgei nohrara.

⁴ Et mun apaahni nohrara an nobohtan asega, im lep intas ura an tid an nobohtan. Et mun ati neom atga iran aien vai nagesega;

⁵ et idivaig natimi inig, et mun tup pam leh ehgan aien, et ahes anliin nilpun neom o un aien; etpu imiacitak aien et idivaig natimi emda et athut emda aien.

⁶ Et ehcohos pan aien an nahaijin nohatag et ethi; et lep arehed aien um vetpan an nahaijin et eche: er eti adenaig tah nitai va nihlup iran.

⁷ Et upene asega intas o Ihova, um ago emda inliinmopja: et inveijec intas alep u Ihova, um ago arapakau ilpu atimi eti ato itai.

⁸ Et atoh nedo inig et asuptecnaig a Ihova, et imiacitak inliinmopja vaig: et adicinadicin intas alep u Ihova, um ago lah nesganimtaija.

⁹ Et upene intas itap er imtitai Ihova vaig, et amen aktit irai iji mesese: et inveijec intas acaiji atimi u Ihova, um atoh asega.

¹⁰ Et upene mika yi esjilid inmerit u atimi vaig irai merit ura vai colt, colt marom et upene um ahinag: et adale um esjilid irai ide hune, nide hune upene marom.

¹¹ Et ahugni lele naheca unyum vaig: et alupas nimtan imi ra era imiaiji ara.

¹² Et ato nedo ahnag o un a di? namu jim aru has unyak aiek ek eti aktaktai vaig.

¹³ Namu lep acaiji nyak naheca unyum aiek, vai ki jim ago nedo has ek aktaktai vaig ainyak; etmu jim esjilid irak: va ekpu upene asega ainyak, um eti amen irak nedo has et ahinag.

¹⁴ Ja etpu upene intas an nipjineucsek im naktaktai u inliinmopok, an nuhup unyum, ak Ihova, nemda unyak, im natimi auanimtan nyak.