Saam 18 - Intas Etipup

SAAM 18.

Et imiahpas Atua a Tevit vai intas acis yi alwai o un et ahinag um esjilid.

¹ ETPU aiyu inliinmopok ainyak vai euc, ak Ihova, na emda unyak aiek.

² Et hehteuc unyak a Ihova, im nuarin atpuh iran unvak, et lep imiatamaig nyak aien; et Atua unyak aien, im nemda unyak; ekpu asgeig iran ainyak; et aibuthan nyak aien; et ipat unyak aien par imicoho nyak, im nuarin ijinies unyak.

³ Ekpu ahlaig vai Ihova ainyak; eris idim ika eri imiahpas yin: uhpu idim imiatamaig nyak vai ilpu atimi tak atimi irak.

⁴ Et arehed irak nopoig eh mas vaig; ekpu imtitaig ainyak vai ilpu atimi auatatimi et ahinag.

⁵ Is arehed irak nohocred uma atmas; is yetpam irak nitai arore eh mas vaig.

⁶ Ekpu ahlaig vai Ihova ainyak an nohocred unyak, um arohwai Atua unyak: etpu atahaijeg nohrak aien an nimnim atimi o un; etpu aridjai nahlaig unyak an nuhup o un, um yetpan irai tikgan.

⁷ Is omoi um eucreucraig nobohtan; is lep amaamai neuhni se u iji au, um eucjeucjeucaij, vai intavaitap o un,

⁸ Is atpoig nadran cap va nedemda o un, is lep atnamud incap, is ahes an nipjineucsen; eris atni huumla iran.

⁹ Is lep imiade pam nohatag aien, um asuol se; is amen inmehcim ithan neduon.

¹⁰ Is ateuc irai jerub aien, um ae; is idim ae aien ijinies an nehpan nimtinjap.

¹¹ Is ago nuarin adenaig imi yin napat aien; is aibuthan yin napat an copda, um arehed iran, im lep napat an nauanohatag.

¹² Is ae napat va naijoran lah an nuhup o un; is atcijaig incopda hat im inmehlai cap aien.

¹³ Is atceteuc inmunuka an nohatag a Ihova, eris ahgei nohrai Atua esjilid acen; is atcijaig incopda hat im inmehlai cap aien.

¹⁴ Is idim atcijaig nefana o un aien um imiterimterim ra; is adia nawainapit aien, um ika yi ehioehio inliinmopora.

¹⁵ Ja is par ame niji ofowai; eris lep ateucrad niji euhni se an nobohtan sepagko vai nated unyum, ak Ihova, im nedemda alupas unyum.

¹⁶ Etpu arahpan va nikman an nohatag aien, um arop irak; etpu ahyausei nyak aien irai wai inyi ahinag.

¹⁷ Etpu imiatamaig nyak aien va natimi tak atimi irak, vaig inig nikavaig, et emda aien; im lep vai ilpu atimi amcel vai nyak, era idim esjilid irak ara.

¹⁸ Erupu yetpam ehelek ara an nopan ohocred unyak; ja et mun atau imi nyak a Ihova.

¹⁹ Et mun imiapan itac nyak aien an nuarin lah: etpu imiatamaig nyak aien va naiyu u inliinmopon vai nyak.

²⁰ Etpu aru irak a Ihova, et idivaig nedo atoh unyak; etpu ago neruvaig vai nyak aien, et idivaig nadicinadicin u nikmak.

²¹ Et mun idim ahced nefalaig u Ihova ainyak; um eti ago nedo has, um udei Atua unyak.

²² Et amen intas alep asega o un an nuhup unyak; inki eti iknipagki irak niji tas o un ainyak.

²³ Ek mun lep ago nedo atoh an nuhup o un ainyak, um imiaha nyak va nedo has unyak.

²⁴ Va nitai inigki, et mun aru irak a Ihova, is idivaig nedo atoh unyak; is idivaig nadicinadicin u nikmak an nuhup o un.

²⁵ Napu ago nedo aiheuc aiek vai ra sji igki era ago nedo aiheuc va atimi ara; napu ago nedo atoh aiek va atimi iji ig era ago nedo atoh ara.

²⁶ Napu ago nedo atoh aiek vai ilpu atimi et atoh nedo ura; napu imiisjis aiek ehele ilpu atimi imiisjis itai.

²⁷ Napu idim imiatamaig ilpu atimi ohocred aiek, ja napu imiasuol ilpu atimi ijinies inliinmopora aiek.

²⁸ Napu idim atni lamp unyak aiek; etpu ago lah napat unyak a Ihova Atua unyak.

²⁹ Ekpu amiliek an pak an nedoa ainyak vai euc; ekpu lep ahtalgaunyi nathatahau ainyak va Atua unyak.

³⁰ Et upene asega nedo o Atua: eh mun ago adicinadicin intas o Ihova: et aibuthan ra asega aien era asgeig iran ara.

³¹ Et idim Atua ache a Ihova; et lep hehteuc et ethi ache a Atua uja.

³² Et aso nyak an nemda a Atua; et, lep atau irak aien, um ago atoh nefalaig unyak.

³³ Et ago neduok aien mika yi idivaig neduei haint; et lep atijai nyak aien irai uarin ijinies unyak.

³⁴ Et esege imi nyak aieu par ago nedoa an nikmak; ek mun aiyihi inceen nefana bras unyak ainyak an nikmak.

³⁵ Na mun aibuthan nyak aiek, um imiatamaig nyak: napu asjiraig aktit nyak aiek an matam; ekpu esjilid ainyak va nedo aiheuc unyum.

³⁶ Napu ago alupas nefalaig imi nyak aiek; etpu eti wuhyilyik neduok ainyak.

³⁷ Ekpu ahau ilpu atimi tak atimi irak ainyak, um uhum ra; ekpu eti lep adumoij ainyak, um imihum pan an nopan iyehki ekpu auahas ra ainyak.

³⁸ Ekpu auud ra ainyak; erupu auatialidi ara natidai vaig: erupu eropropse ara ithan neduok.

³⁹ Na mun aso nyak aiek an nemda unyum par ago nedoa: napu imiasuol ra sji igki aiek era mun aat irak ara.

⁴⁰ Na mun ika aiek eri aha vai nyak a ilpu atimi tak atimi irak; ekpu auahas ilpu atimi amcel vai nyak ainyak.

⁴¹ Erupu ahlaig ara, jai etpu eti eteuc tah par imiatamaig ra; erupu ahlaig vai Ihova ara, ja etpu eti atahaijeg ra aien.

⁴² Ekpu atcei ra ainyak; erupu idivaig inmah ara et atpoig vai nimtinjap: ekpu imiterimterim ra ainyak et idivaig nohok irai efalaig.

⁴³ Napu imiatamaig nyak aiek va nehtauo o ilpu atimi unyak; napu ati nyak aiek mika ki atimarid ainyak irai nup urai pece: erupu aheca unyak a nup uran pece inig kis eti ato ra ainyak.

⁴⁴ Eni wit atahaijeg vai nyak ara, erupu imiaiji intas unyak ara: erupu efaifa a nup urai taka uarin, um atpuse an nuhup unyak.

⁴⁵ Erupu tiih a ilpu atimi irai taka pece; erupu lep imtitaig ara irai irahed ura.

⁴⁶ Et idim umoh a Ihova; naaurinig van hehteuc unvak; uhmu lep imiahpas Atua unyak, et imiatamaig atimi aien.

⁴⁷ Et ika a Atua, ki aru nedo o atimi ainyak; is lep ika aien, ki esjilid irai nup urai pece ainyak.

⁴⁸ Et imiatamaig nyak aien vai ilpu atimi tak atimi irak: maiya, napu imiaridjai nyak aiek, mika ki esjilid ainyak irai ra sji igki era aat irak ara: napu imiatamaig nyak aiek vai ilpu atimi atoraliak itai.

⁴⁹ Va nitai inigki, ekpu ago naaurinig vai euc ainyak, ak Ihova, an nuhup u nup urai pece, um acesaces nohranitai va nidam.

⁵⁰ Et imiatamaig emda natimarid o un a Atua; um lep aiheuc vai yin is ati yin aien, Tevit marom, im lep ilpu mapon irai iji mesese.