Saam 17 - Intas Etipup

SAAM 17.

1 Et ika a Tevit et asgeig an nedo inveijec o un aien; va nitai inigki, et ugyi Atua aien mika yi imicoho yin aien vai ilim atimi tak atimi iran. 10 Et asuptecnaig nijinies u inliinmopora aien, im nedo efaifa ura, im inmerit alupas ura par auahas yin. 13 Et imiisjis ninveijec intas o Atua aien, um alaigaheni mika yi imiatamaig yin vai ra.

¹ AK Ihova, namu atahaijeg nyak aiek, nikavaig, nedo atoh un-yak, um ahidaig pam euc u nahlaig unyak; namu adai intas alaiga-lieni unyak aiek, et ahes au nipjineucsek et eti efaifa.

² Etpu ahes an nuhup unyum intas alep vai nyak, um ehcohos pam: namu almoi nedo atoh unvak aiek au nesganimtam.

³ Na mun ahilek inliinmopok aiek, um ato nedo unyak; na mun ateghe nyak aiek an nepig; na mun ahilek inliinmopok aiek, ja napu eti ecetai tah nitai aiek; inyi: tup ethi ache intas unyak im naktaktai unyak.

⁴ Era ago nedo has natimi, ja ek udei nefalaig u ilpu atimi auatatimi ainyak va niji tas as asaig aiek.

⁵ Ek mun atga irai efalaig unyum ainyak: ek eti atga ahnag ainyak.

⁶ Ek mun ahlaig vai euc ainyak, ak Atua, napu idim atahaijeg intas unyak aiek: namu atgeig pam intikgam aiek ehelek, um adai intas unyak.

⁷ Namu ehvaig upene naiheuc esjilid unyum aiek; na imiatamaig ra sji igki aiek an nikmam inmatam, era asgeig iram ara, vai ra sji igki era aat ira ra ara.

⁸ Namu aminjinaig nyak aiek et idivaig nohwa naga napig an nesganimtam; napu aibuthan nyak aiek an naiyu an nehpam,

⁹ vai nesganimtai ilpu atimi auatatimi, era mun ehcerucai nyak ara, im ilpu atimi edemda vai nyak, era arehed irak ara.

¹⁰ Et ipjin inliinmopora ara: era asan tas ijinies ara an nipjineucsera.

¹¹ Era arehed irama ara an nopan inig an natga asega unyima: erupu amah irama ara, par ago nedo acalacal an pece;

¹² et idivaig laion et merit aien inces yi oplecoplec itai vaig, um lep idivaig laion emda et atpuh aien irai iji uarin adenaig.

¹³ Ak Ihova, namu atidai aiek, um atapnes ra, um erekhaigse ra; namu imiatamaig nyak aiek an nauitoga unyum, vai ilpu atimi auatatimi;

¹⁴ um lep imiatamaig nyak an nikmam, ak Ihova, va atimi iji ig, va atimi an nobohtan, era ohuun itai ara an nopan inig, napu ika aiek eri geije va niji itai esjilid et ahinag; erupu ahinag a ilpu hal ura; erupu lep udei niji itai ura ara imi ilpu halav haklin ura.

¹⁵ Ja ekpu almoi nesganimtam ainyak pan au nedo atoh unyak: eku wit nusjai ainyak, ekpu imiacitak ainyak va nehcohos pam unyum.