Saam 16 - Intas Etipup

SAAM 16.

1 Et ika a Tevit et eti asgeig an nedo upene o un aien; et edemda aien va nedo apat; et aha pan ehele Atua aien, mika yi imiatamaig yin. 5 Et asuptecnaig nimiisjis ninveijec o un aien, im nusjai u atimi vai inmas ura, im nitai umoh iran inig inyi eti lep ti.

¹ AK Atua, namu imicoho nyak aiek: vaig inig nikavaig, ek asgeig iram ainyak.

² Ek ika ainyak ehele Ihova, Na Atimarid unyak aiek: et ahes ehelum namen upene unyak;

³ et uce nedo o ilpu atimi upene an pece unyak, im ilpu atimi esjilid, ek imiacitak alupas ra ainyak.

⁴ Etpu ahinag nohocred ura era ahilek intak atua ara: inki eti ahlap ainyak irai iji itai ahlap an ja irai itai ura er umnyi, mil eti asa nidara an nipjineucsek.

⁵ Et idivaig nuarin imtak a Ihova, im lep nipjinitai unyak; napu ika aiek yi elvalupas nuarin amen iran unyak.

⁶ Eris wat ahai itai, eris asaig niji itai upene imtak; et idim upene namen unyak.

⁷ Ekpu ago naaurinig vai Ihova ainyak, is asuptecnaig atoh ehelek aien: et mun lep ahugni lelek inliinmopok nai iji epig.

⁸ Ek mun ati Ihova an nuhup unyak ainyak irai iji adiat: et amen aien an matak, va nitai inigki, ekpu eti amaamai ainyak.

⁹ Va nitai inigki, et imiacitak inliinmopok ainyak, et lep cediaig nesgak: etpu atumop nohuk ainyak um aitgaig inusjai unyak.

¹⁰ Napu idim eti udei nyak aiek uma atmas; napu eti atcijaig Natimi Upene unyum aiek mika yi mutit.

¹¹ Napu asjaaicnaig aiek nefalaig inig et yetpan u nitai umoh iran: et eteuc nimiacitak alupas annuhup unyum; im lep incediaig an matam irai iji mesese.