Saam 15 - Intas Etipup

SAAM 15.

Et asuptecnaig nedo o nup u Saion a Tevit.

¹ AK Ihova, etpu amen a di anliin neom atga unyum? etpu amen se a di an nedoon itap unyum?

² Aien et ahced nefalaig upene aien, um ago nedo atoh, um asan tas inveijec an liinmopon.

³ Aien et eti hos tas aien an nipjineucsen, um eti agahas irai ilpu etwan, um eti ika eri asaig intas has vai ilpu etwan.

⁴ Et amcel va natimi inig aien et atimi auatatimi aien: ja etpu ecen vai ra sji igki aieu era imtitai Ihova ara: et asig yi aktit intas aien, ja et wat has aien vai intas iyehki et eti adumoij iran aien.

⁵ Et eti ahtai mune o un aien mika yi lep leh neruvaig alupas; et eti leh nimtan aien mika yi asan tas alep acalacal vai ra et ti nedo has ura. Aien et ago nitai iji igki aien, inyi eti etehto aien irai iji mesese.