Saam 147 - Intas Etipup

SAAM 147.

1 Et ahugni atimi a naprofeta mika eri imiahpas Atua ara, va nedo o un par aminjinaig nup an nakalasia o un, 4 va nemda o un, 6 va nedo aiheuc o un: 7 eri imiahpas yin va nedo o un par aminjinaig itai: 12 eri lep imiahpas yin va nitai upene iji ig et alupai nup an nelcau o un aien, 15 va nemda o un irai itai an nauanohatag, 19 im lep va nalaigaheni inig is ati aien an neom itap o un.

¹ AKUMU imiahpas Ihova aijaua: et upene par acesaces nohraiitai vai Atua uja; nedo esjilid nigki; et upene par imiahpas yin.

² Et uctaig nathatahau Jerusalem a Ihova: et asjapicnaig ilpu ahri nup Isreel aien.

³ Et ago cehcehe ra sji igki aien et auatialidi inliinmopora ara, um aso inmocop ira ra.

⁴ Et esvi niji moijeuv aien; et lep anvi nidara asega aien.

⁵ Et esjilid Natimarid uja, et alupas nemda o un: et esjilid acen nato itai o un.

⁶ Et imiatidai ilpu atimi upoupo a Ihova: et lep erekhaig se an nobohtan ilpu atimi auatatimi aien.

⁷ Akumu acesaces jipe nohraiitai vai Ihova aijaua, um ago naaurinig; akumu imiahpas Atua uja aijaua irai harp:

⁸ et elgelgei napat an nohatag aien, um ago incopda va nobohtan, um ika yi ededel nefelelicai irai lola edoon.

⁹ Et alupai niji itai eklim edo irai pece nitai caig incara aien, im lep inhakli meijcop, era ahlaig vai yin ara.

¹⁰ Et eti imiacitak nemda u hors aien: et lep eti upene iran neduei ilpu eucsupo.

¹¹ Et imiacitak ra sji igki a Ihova era imtitai yin ara, ra sji igki marom era asgeig an naiheuc o un ara.

¹² Ak nup u Jerusalem, akumu imiahpas Ihova aijaua; ak nup u Saion, akumu imiahpas Atua unyimia aijaua.

¹³ Et mun ago emda niji tapnes irai eucse athatahau unyimia aien; et mun acis yi alwai ilpu hal unyimia aien era amen ehelemia ara.

¹⁴ Et ati nigpa aien irai pece unyimia, um ika aki geije aijaua irai itai hegaig upene.

¹⁵ Et imiapaahni intas alep o un aien an nobohtan: et athut emda intas o un.

¹⁶ Et ago sno aien et idivaig numri siip: et ohaig nopoigmul aien et idivaig nohpa.

¹⁷ Et atcijaig incopda hat aien et idivaig nahri itai hegaig: et emda a di par atidai an nuhup u neiweiyu o un?

¹⁸ Et asaig intas o un aien, um ago updak ra: et ika aien yi ehlehel an nimtinjap o un, et lep yah inwai.

¹⁹ Et ehvaig intas o un aien ehele ilpu mapoi Jekob, im lep intas alep o un im nedo atoh o un ehele nup Isreel.

²⁰ Et mun eti ago nedo et idivaig inig aien vai nup urai taka pece: lep eti ato nedo atoh o un ara. Akumu imiahpas Ihova aijaua.