Saam 146 - Intas Etipup

SAAM 146.

1 Et tas etipup a naprofeta, um ika, yi imiahpas Atua aien irai iji adiat. 3 Et acaiji atimi aien, ra eri jim asgeig ira atimi. 5 Et upene a Atua ache, va nemda o un, im nedo atoh o un, im nedo aiheuc o un, im nelcau o un, mika eri asgeig iran.

¹ ARUMU imiahpas Ihova aijaua. Etmu imiahpas Ihova inliinmopok ainyak.

² Ek wat umoh ainyak, ekpu imiahpas Ihova ainyak: ekpu acesaces nohranitai vai Ihova ainyak irai iji adiat.

³ Akumu jim asgeig irai ilpu atimarid aijaua, im lep ira atimi, et idim elika vai ra par imiatamaig tah.

⁴ Et dikjai nesgara; era adumoij pan ara an nobohtan inig eris ahes iran ara; et lep tiih naktaktai ura an nadiat iyehki.

⁵ Et mun ahesmoij a natimi inig et atau imi yin a Atua u Jekob, et lep asgeig irai Ihova aien Atua o un:

⁶ is ago nohatag aien, im nobohtan, im injap, im niji itai asega iran: et lep aminjinaig intas inveijec aien irai iji mesese:

⁷ et ago nedo atoh a Ihova vai ilpu atimi er ehcerucai ra: et alupai ilpu atimi ehtele ra nitai caig incara aien. Et ahiyi ilpu atimi eris arore ra aien:

⁸ et asalgei nesganimtai ilpu atimi apat nesganimtara a Ihova: et imiatidai ra a Ihova era apakapak ara: et aiyu inliinmopoi Ihova vai ilpu atimi et atoh nedo ura:

⁹ et aminjinaig nup urai taka pece a Ihova; et asjiraig ilpu umnij aien im ilpu takata eris emesmas a ilpu atumnyu ura: ja et ago acalacal nefalaig u ilpu atimi auatatimi aien.

¹⁰ Etpu atimarid a Ihova irai iji mesese; ak nup u Saion, etpu atimarid a Atua unyimia ahes an nopan inig um yetpan irai iji mesese. Akumu imiahpas Ihova aijaua.