Saam 144 - Intas Etipup

SAAM 144.

1 Et imiahpas Atua a Tevit va naiheuc o un vai yin im lep va atimi. 5 Et ugyi Atua aien mika yi imiatamaig emda yin vai ilpu atimi tak atimi iran. 9 Et ika aien yi imiahpas Atua aien. 11 Et alaigaheni aien va namen upene u nup uran nelcau o un.

¹ NAAURINIG vai Ihova inhehteuc unyak, et ika aien yi imjijeuc nikmak an nehtauo, im nupsikmak an nedoa:

² et aiheuc vai nyak aien; et eom emda unyak aien, im neom ijinies unyak, im natimi imiatamaig nyak, im nitai atapin unyak, ek asgeig iran ainyak; et ika aien eri atahaijeg nyak a nup uran pece unyak.

³ Ak Ihova, di natimi, mika an ato ra aiek! im ilpu hal u natimi, mika an aktaktai ra aiek!

⁴ Era idivaig intakitai natimi: era idivaig nalmuitai ara, et lep tiih niji adiat ira ra.

⁵ Ak Ihova, namu imiade pam nohatag unyum aiek, um asuol sepam: namu atcei pan niji edoon aiek, etpu lep adpoig nadran cap iran.

⁶ Namu adia nawainapit aiek, um imiterimterim ra: namu atcijaig nidjai efana unyum aiek um auahas ra.

⁷ Namu atgeig yi apidi nikmam aiek ijinies; namu ahyausei nyak aiek irai wai et ahinag, um imiatamaig nyak vai nup urai taka pece;

⁸ era asaig intas ahcil an nipjineucsera ara, et lep amen nedo efaifa an matara.

⁹ Ak Atua, ekpu acesaces nohranitai mat ainyak vai euc: ekpu acesaces nohranitai ainyak vai euc irai saltere et amen inya et ten iran.

¹⁰ Na imiatumumoh ilpu atimarid aiek: na lep imiatamaig Tevit naheca unyum aiek, vai edoa iji ig et has.

¹¹ Namu imiatamaig nyak aiek, um atipagki nyak va nikmai nup urai taka pece,era asaig intas ahcil an nipjineucsera ara, et lep amen nedo efaifa an matara:

¹² mika eri idivaig itai ahwaig et ededel a ilpu halav atamaig unyima um alupas an takuras ura; eri lep idivaig inhat iji ig, er ates um ahumiaig uri nesvi va neom itap, a ilpu halav atahig unyima:

¹³ mika yi ohua niji itai obotpot itai caig irai eom ikni itai hegaig iran unyima: mika eri lep ahad siip unyima um yetpan irai dausant inyi ahinag acen irai uari nobohtan unyima:

¹⁴ mika eri emda kurimatau atamaig unyima par auritai; etmu jim has tah nitai, um jim tup tiih niji itai; mika eri jim aunyauwaig irai imnim unyima.

¹⁵ Era mum ahesmoij natimi iji igki, et uce namen ura: era mun ahesmoij natimi iji igki, et Atua ura a Ihova.