Saam 143 - Intas Etipup

SAAM 143.

1 Et ugyi Atua a Tevit, mika yi almaijidjid upene yin aien. 3 Et tas taigtaig va niji ohocred o un aien. 5 Et ago emda nimiisjis ninveijec o un aien va naktaktai im nalaigaheni o un. 7 Et lep ugyi Atua aien, mika yi aiheuc vai yin aien, 9 imiatamaig yin, 10 um ago upene yin, 12 um auahas ilpu atimi edemda vai yin.

¹ AK Ihova, namu atahaijeg nalaigaheni unyak aiek; namu atgeig pam intikgam aiek vai intas ugyi unyak: namu adai intas unyak aiek an nedo inveijec unyum im nedo upene unyum.

² Namu jim ahilek nedo u naheca unyum aiek: et idim eti atoh an nuhup unyum nedo o un tah et umoh aien.

³ Et idim atmas piv vai nyak a natimi tak atimi irak; et auud se nyak an nobohtan aien; et ati nyak aien mika ki amen ainyak an napat, et idivaig ra sji igki eris emesmas ara itu acen.

⁴ Et idim ohocred inliinmopok ainyak: et lep auatialidi inliinmopok.

⁵ Ek imiehva niji adiat itu acen ainyak; ek aktaktai niji auritai asega unyum ainyak; ek aktaktai nauritai irai ikmam ainyak.

⁶ Ek atgeig yi apidi nikmak ehelum ainyak; et idivaig inpece et ti inwai iran inliinmopok ainyak, um merit alupas vai euc. Sila.

⁷ Ak Ihova, namu auroauro aiek um atahaijeg intas unyak: et auatialidi inliinmopok ainyak: namu jim adenaig nesganimtam aiek vai nyak, vai ki jim ohocred ainyak, um idivaig ra sji igki era asuol anliin nehpanitai ara.

⁸ Ekpu atahaijeg va nedo aiheuc unyum ainyak an nuhialeg; ek idim asgeig iram ainyak: namu asjaaicnaig ehelek aiek an nefalaig inig et upene, mika ki atga iran ainyak; et idim aridjai ehelum inliinmopok ainyak.

⁹ Ak Ihova, namu imiatamaig nyak aiek vai ilpu atimi tak atimi irak: ek atpuh ehelum ainyak.

¹⁰ Namu esege imtak aiek mika ki ago nitai merit unyum ainyak; nai idim Atua unyak aiek: etmu atau irak a Nesgam upene an nefalaig isjeuc asega.

¹¹ Ak Ihova, napu imiatumumoh nyak aiek va nidam: napu imiatamaig nyak aiek irai ohocred unyak an nedo upene unyum.

¹² Napu lep auahas ehni ilpu atimi tak atimi irak aiek, um ika eri emesmas ara asega era auoh ohocred nyak ara: ek idim aheca unyum ainyak.