Saam 141 - Intas Etipup

SAAM 141.

1 Et ugyi Atua a Tevit mika yi adai intas o un aien, 3 im lep mika yi inveijec inliinmopon va Atua, 7 im lep mika yi amen upene aien va nedo efaifa u ilpu atimi auatatimi.

¹ AK Ihova, ek ahlaig vai euc ainyak: namu auroauro aiek um apam ehelek; atahaijeg nohrak, ek wat ahlaig vai euc ainyak.

² Etmu amen aktit nalaigaheni unyak an nuhup unyum, et idivaig nitai auanipin upene; im nadaigjai nikmak, et idivaig nitai ahlap an jupura.

³ Ak Ihova, namu ati nitai aminjinaig nipjineucsek aiek; namu aminjinaig intapnes an nipjineucsek aiek.

⁴ Etmu jim ilaig inliinmopok ainyak an tah intas has, par ago nauritai has ehele ilpu atimi ago nedo has: ekmu jim caig niji itai adale ura ainyak.

⁵ Uhmu ated ilpu atimi upene, um acaiji ra: naiheuc nigki, um idivaig narakei auanipin upene uri nidjini atimi; era eti esjum vaig ara: eris idim lep ika, eri alaigaheni ara irai ohocred ura.

⁶ Uhu wit erekhaigse ilpu atimi alupas ura irai iblai ij, erupu atahaijeg intas unyak ara; et idim adale.

⁷ Er terimterim niji eduoma an neucse nehpanitai, et idivaig nedo o un tah et acujitai an nobohtan aien, um ahapol.

⁸ Ak Ihova Natimarid, et aes pan euc nesganimtak ainyak: ek mun asgeig iram ainyak; namu jim atgei nyak aiek.

⁹ Namu aminjinaig nyak aiek va nitai apro nyak iji ig eris ikni vai nyak, im lep nopoig u ilpu atimi ago nedo has.

¹⁰ Erumu ispara epihtau a ilpu atimi auatatimi irai opoig ura, ja ekpu aha ainyak um amen upene.