Saam 140 - Intas Etipup

SAAM 140.

1 Et ugyi Atua a Tevit mika yi imiatamaig yin aien vai Saal im Toec. 8 Et ugyi Atua aien mika yi aru nedo urau. 12 Et eropse inliinmopon aien va nasgeig ira Atua o un.

¹ AK Ihova, namu imiatamaig nyak aiek vai ilpu atimi auatatimi: namu imicoho nyak aiek vai ilpu atimi atgei atmas;

² era aktaktai nedo has an liinmopora ara; era tas alep ara va nedoa irai iji adiat.

³ Et acen intas ura; era idivaig imyeuv ara; et ahes an nipjineucsera intas ehniv, et idivaig nitai acen inig et ahes an nipjineucse nispeuv has. Sila.

⁴ Ak Ihova, namu aminjinaig nyak aiek va nikmai ilpu atimi auatatimi; namu imicoho nyak aiek vai ilpu atimi atgei atmas; era mun aktaktai ara par auahas natga unyak.

⁵ Era mun adenaig nopoig im inwau vai nyak a ilpu atimi et ijinies inliinmopora; era mun elgelgei nopoig ara an nahaijin nefalaig; era mun lep ikni niji itai anai nyak iran ara. Sila.

⁶ Ek ika ehele Ihova ainyak, Na Atua unyak aiek: ak Ihova, namu atahaijeg intas ugyi unyak aiek.

⁷ Ak Ihova Natimarid unyak, na atimi imiatamaig nyak aiek; na mun emda aiek; na mun adahpoi nidjinik aiek an nadiat er ati nedoa iran.

⁸ Ak Ihova, namu jim alupai ilpu atimi auatatimi nitai merit ura aiek: um jim ika eri ago yi idivaig naktaktai has ura; vai yi jim ijinies inliinmopora ara. Sila.

⁹ Ja et echamecha va nidjini ra sji igki era arehed irak ara; etpu adahpoi ra nitai has is ahes an nipjineucsera.

¹⁰ Etpu etjose ijinies ira ra inhuumla ehri: uhpu erekhaig jai ra an cap; im lep irai wai ubo, mika eri jim lep atidai ara.

¹¹ Erupu eti amen aktit an pece ura a ilpu atimi iji ig era asan tas has ara: etpu apitac atimi atgei atmas a Atua par auahas ra.

¹² Ek ato ainyak mika etpu atau imi ilpu atimi ohocred a Ihova, um ago nedo atoh vai ilpu ihki atimi.

¹³ Erupu idim ago naaurinig va nidam a ilpu atimi upene ache: erupu amen a ilpu atimi inveijec an nuhup unyum.