Saam 14 - Intas Etipup

SAAM 14.

1 Et asuptecnaig nedo has u natimi inig a Tevit et eteuc inliinmopon itu. 4 Et acaiji ilpu atimi auatatimi aien an lah u inliinmopora. 7 Et imiahpas Atua aien va nimiatamaig yin o un.

¹ ET mun ika an liinmopon a natimi inig et ahnag aien, Et ti tah Atua. Era has esjilid ara; era ago nedo er amcelvaig ara; et eti ago nedo upene tah.

² Is amen a Ihova an nohatag, um eas sepam, par alum atimi um ato; kit is ago nedo arapakau tah et ethi, um ahilek Atua, ka oʼo.

³ Era mun adumoij pan itac ara asega; era ehras eheshas ara asega: et eti ago nedo upene tah; et idim ti tah.

⁴ Era idim eti ato itai a ilpu atimi auatatimi iji igki asega; era auahas ilpu atimi unyak ara, et idivaig era caig nitai caig ura ara, um eti arohwai Ihova.

⁵ Is esjilid acen nimtitaig ura eahki; et idim amen a Atua ehele ilpu atimi upene.

⁶ Akupu imiafakahcil naktaktai u ilpu atimi ohocred aijaua, nikavaig, era asgeig irai Ihova ara.

⁷ Ek merit alupas ainyak mika yi ahes Saion tah um imiatamaig nup Isreel; etu wit imiadumoij ilpu atimi o un a Ihova eris lucsei pan ra, erumu imiacitak a ilpu mapoi Jekob, erumu lep cediaig a nup Isreel.