Saam 139 - Intas Etipup

SAAM 139.

1 Et imiahpas Atua a Tevit, vaig inig nikavaig, et alum itai asega aien um aminjinaig, 17 im lep va nedo aiheuc o un et esjilid acen. 19 Et tas emda aien vai ilpu atimi auatatimi. 23 Et alaigaheni aien mika yi inveijec aien.

¹ AK Ihova, na mun ahilek inliinmopok aiek, um ato nyak.

² Na ato nateucse vaig unyak aiek, im natidai vaig unvak, na ato naktaktai unyak aiek itac acen.

³ Na almoi natga unyak aiek, im nasjeuc unyak, na lep ato upene aiek nedo asega unyak.

⁴ Ak Ihova, na idim ato upene aiek intas asega an nipjineucsek.

⁵ Na amen arehed irak aiek an cehek im lep an nuhup unyak, um atijai nikmam ijinies irak.

⁶ Et ehka vai nyak nato vaig nitai iji igki; et esjilid acen, et ehka o un vai nyak inyetpan vaig.

⁷ Ekpu aha pan eda ainyak vai Nesgam? ekpu aha pan eda ainyak vai nesganimtam?

⁸ El ek aridjai an nohatag ainyak, na amen eahki aiek: el ek ahled intinak ainyak sepagko, na idim amen eahki aiek.

⁹ Ekpu ae ainyak um auroauro et idivaig inlah an nuhialeg: ekpu amen ainyak irai uarin itac acen an jap;

¹⁰ napu idim atau irak eahki aiek an nikmam; napu lep asjiraig nyak aiek an matam.

¹¹ Ek um ika ainyak, Etpu idim ataluopni pam nyak napat; etpu idim epig inlah, um arehed irak.

¹² Et eti apat vai euc an nepig; ja et lah nepig et idivaig nadiat: et tup apapa napat im inlah an nuhup unyum.

¹³ Na ohuun nesgak aiek: as adahpoi nyak aiek an nipjinetgai risik.

¹⁴ Ekpu ago naaurinig vai euc ainyak; eris idim ago nyak an nedo imtitaig im nedo imiali: et itai imiali niji auritai unyum; ek idim ato upene ainyak.

¹⁵ Eris eti adenaig nohuk vai euc, an nopan iyehki eris wat ago nyak an nuarin adenaig, um yecrei upene nyak irai uarin ubo an nobohtan.

¹⁶ As almoi nohuk aiek an nesganimtam, eris wat tup pam atupun; eris lep aged niji adiat asega unyak an nitaasviitai unyum; eris ago niji adiat unyak, ija is eti fi eteuc tah.

¹⁷ Ak Atua, et upene acen irak naktaktai unyum! et idim ahinag acen!

¹⁸ El ek esvi ainyak, el et ahinag acen um esjilid an nauanahvig: ek wat aiji lahlah ainyak, ek amen ehelum ainyak.

¹⁹ Ak Atua, napu idim atgei ilpu atimi auatatimi aiek: akumu udei nyak aijaua, ak ilpu atimi atgei atmas.

²⁰ Era aniv euc ara um ago nedo has, era lep tup asaig nidam a ilpu atimi tak atimi iram.

²¹ Ak Ihova, ek idim amcel vai ra sji igki ainyak era amcel vai euc ara: ek lep esjum ainyak vai ra sji igki era aat iram ara.

²² Ek idim amcel alupas vai ra ainyak: ek ika ainyak era ilpu atimi tak atimi irak ara.

²³ Ak Atua, namu ahilek nyak aiek, um ato inliinmopok: namu almaijidjid nyak aiek, um ato naktaktai unyak:

²⁴ um almoi, kit et amen ehelek tah nedo er ohocred vaig; um atau irak an nefalaig inig, et ahes iran nitai umoh iran nai iji mesese.