Saam 138 - Intas Etipup

SAAM 138.

1 Et imiahpas Atua a Tevit, vaig inig nikavaig, et inveijec intas o un. 4 Et ika aien eri imiahpas Atua a ilpu atimarid an nobohtan. 7 Et ika aien et asgeig ira Atua aien.

¹ EKPU imiahpas euc ainyak an liinmopok asega: ekpu acesaces nohranitai vai euc ainyak, um amcel vai ilpu atmas,

² Ekpu atpuse ainyak u neom ahlap upene unyum, um imiahpas nidam va naiheuc unyum im nedo inveijec unyum: as idim ati intas upyi asaig unyum aiek, mika yi esjilid an nidam asega.

³ An nadiat iyehki, kis ahlaig vai euc ainyak, as adai intas unyak aiek um ago emda inliinmopok.

⁴ Ak Ihova, erupu imiahpas euc a ilpu atimarid asega an nobohtan, eru wit atahaijeg intas an nipjineucsem ara.

⁵ Erupu idim acesaces nohranitai ara um ahced efalaig u Ihova: etpu idim esjilid natimi alupas u Ihova.

⁶ Et esjilid a Ihova, ja et alum ilpu atimi et upoupo inliinmopora aien: ja et ato ra itac acen aien et ijinies inliinmopora ara.

⁷ El ek atga an nohocred ainyak, napu imiatumumoh nyak aiek: napu atgeig yi apidi nikmam aiek vai intavaitap u ilpu atimi tak atimi irak, napu lep imiatamaig nyak aiek an matam.

⁸ Etpu ago ehni itai vai nyak a Ihova: ak Ihova, et amen naiheuc unyum irai iji mesese: namu jim udei nauritai irai ikmam aiek.