Saam 137 - Intas Etipup

SAAM 137.

1 Eris apol aktit an nalaigaheni ura a nup u Jutaia, eris wat ilpu ohna ara, 7 Et asan tas ahlaijaig a naprofeta vai nup Itom im nup u Babelon.

¹ ECRIS ateucse eahki aijama ui ofowai Babelon; ecris wat imiehva Saion aijama, ecris idim taig aijama.

² Ecris aijcei harp unyima aijama ijinies irai cai umumoh eahki an niblan pece.

³ Eris ugyi cama ara sji ehki eris iknipagki cama ara, mika ecri acesaces nohranitai aijama eahki: eris lep ehlek laav ara sji ehki eris auoh ohocred cama ara, um ika, Akumu acesaces nohranitai irai Saion imi cama aijaua.

⁴ Ecrupu acesaces nohranitai u Ihova aijama an pece ui tak atimi um uauo?

⁵ El ek ahnag iram ainyak, ak Jerusalem, etmu ahnag an namarero o un inmatak.

⁶ El ek eti imiehva euc ainyak; el et eti esjilid nimiacitak Jerusalem unyak irai iji itai asega ek imiacitak vaig ainyak, etmu mas nipjineucsek ainyak.

⁷ Ak Ihova, namu imiehva nadiat iyehki aiek eris auahas Jerusalem, um aru nedo o nup Itom; eris ika ara, Alcapdicraig, alcapdicraig, um yetse irai iji ededuon.

⁸ Ak ilpu ihki atimi, nup u Babelon, etmu ahesmoij aien etpu aru iramia aien yi idivaig akis ara irama aijaua.

⁹ Etmu ahesmoij aien et arahpan ilpu halav haklin unyimia aien, um auhaig yi oplecoplec ra irai hat.