Saam 135 - Intas Etipup

SAAM 135.

1 Er ahugni atimi mika eri imiahpas Atua ara, va nedo aiheuc o un, 5 va nemda o un, 8 va neruvaig o un irai ilpu atimi auatatimi. 15 Et takitai niji atmasimai. 19 Er idim ika eri imiahpas Atua.

¹ AKUMU imiahpas Ihova aijaua. Akumu imiahpas nidai Ihova aijaua; ak ilpu aheca o Ihova, akumu imiahpas yin aijaua.

² Ak ra sji igki, eka aiji anliin neom o Ihova aijaua, anliin nokoro u neom o Atua uja marom,

³ akumu imiahpas Ihova aijaua: et idim upene a Ihova: akumu acesaces nohraiitai vai nidan aijaua; et idim upene.

⁴ Is ikni ilpu mapoi Jekob imi yin a Ihova, im lep nup Isreel mika eri ilpu halav cap o un ara.

⁵ Ek idim ato ainyak mika et esjilid a Ihova, et lep esjilid a Natimarid uja irai ilpu atmas asega.

⁶ Et ago niji itai asega a Ihova is ika aien yi eteuc an nohatag, im lep an nobohtan, im lep an jap, im lep irai iji uarin ubo asega.

⁷ Et ika aien yi aridjai inmoso an nobohtan asega; et ago nawainapit aien vai incopda; et lep ika aien yi ahes nimtinjap irai uarin iji ig eris ikni iran.

⁸ Is auud ilpu halav atamaig inmeto aien an pece Ijipt, um atupun ira atimi um yetpan irai iji itai eklim edo irai pece.

⁹ Is ago niji itai elika aieu im niji itai imiali an nuhup unyimia, ak nup Ijipt, irai Fero, im lep irai ilpu aheca o un asega.

¹⁰ Is auud nup urai pece is ahinag aien, um atgei ilpu atimarid emda.

¹¹ Is auud Saihon natimarid u nup Emor aien, im Oc natimarid an pece Besan, im nup urai iji elcau asega Kenan:

¹² um alupai nup Isreel inpece ura, mika eri ohuun ara, inpece inig marom, mika eri ohuun a nup Isreel ilpu atimi o un.

¹³ Ak Ihova, et amen aktit nidam irai iji adiat; ak Ihova, et amen aktit nitai imiehva euc irai iji mesese.

¹⁴ Etpu almaijidjid ilpu atimi o un a Ihova, etpu lep eche inliinmopon aien vai ilpu aheca o un.

¹⁵ Et silver im colt natmasimai u nup urai iji pece, nauritai irai ikma atimi.

¹⁶ Et eteuc nipjineucsera, ja era eti tas ara; et eteuc nesganimtara, ja era eti alum itai ara;

¹⁷ et eteuc intikgara, ja era eti ahgei itai ara; era lep eti umumoh ara.

¹⁸ Erupu idivai ra a ilpu atimi ago ra: ara asega marom era asgeig ira ra ara.

¹⁹ Akumu imiahpas Ihova aijaua, ak nup Isreel: akumu imiahpas Ihova aijaua, ak ilpu mapoi Eron:

²⁰ akumu imiahpas Ihova aijaua, ak ilpu mapoi Livai: akumu imiahpas Ihova aijaua, ak ilpu atimi imtitai yin.

²¹ Erumu imiahpas Ihova a nup u Saion, et amen Jerusalem aien. Akumu imiahpas Ihova aijaua.