Saam 130 - Intas Etipup

SAAM 130.

1 Et ika a naprofeta et imiisjis ninveijec intas o Atua aien an nalaigaheni o un, 5 et eti auatiemda aien an naitgai itai o un. 7 Et ahugni nup Isreel aien mika eri asgeig ira Atua ara.

¹ AK Ihova, ek ahlaig vai euc ainyak ahes irai iji uarin ubo.

² Ak Natimarid, namu ahgei nohrak aiek: namu atgeig pam intikgam aiek ehelek, um atahaijeg intas ugyi unyak.

³ Ak Ihova, el et asjaaicnaig nedo has u atimi aiek, ak Natimarid, etpu ehka vaig tah naiji aktit vaig.

⁴ Jai nai idim iknipagki nedo kis ura aiek, va uhpu imtitaig euc.

⁵ Ek aitgai Ihova ainyak, et aitgai yin inliinmopok ainyak, ek aitgaig intas o un ainyak.

⁶ Ek aitgai Ihova ainyak, um esjilid irai ilpu atimi aitgaig pan an nadiat: ilpu atimi aminjinaig nadiat marom.

⁷ Akumu asgeig irai Ihova aijaua, ak nup Isreel: et idim aiheuc va atimi a Ihova; et lep imiatamaig alupas atimi aien.

⁸ Etpu imiatamaig nup Isreel aien va nedo has asega ura.