Saam 121 - Intas Etipup

SAAM 121.

Intas va namen upene u ilpu atimi ecen va Atua, era asgeig ira Atua ara mika yi aminjinai ra.

¹ EK yiasji pan ainyak irai iji edoon. Et ahes nitai atau imi nyak eda?

² Et ahes ehele Ihova nitai atau imi nyak marom, is ago nohatag aien im nobohtan.

³ Etmu ika aien yi jim epihtau neduom: etmu jim imtate aien et aminjinai euc aien.

⁴ Inyi idim eti imtate aien aigki, ura eti umjeg, et aminjinaig nup Isreel aien.

⁵ Et aminjinai euc a Ihova: et aiyu vai euc a Ihova an matam.

⁶ Inyi eti aces euc nagesega an nadiat, im lep inmohoc an nepig.

⁷ Etpu aminjinai euc a Ihova va niji itai has asega: etpu aminjinaig nesgam aien.

⁸ Etpu aminjinaig euc a Ihova an napan unyum im lep an napam unyum, an nopan inig um yetpan irai iji mesese.