Saam 116 - Intas Etipup

SAAM 116.

1 Et ika a naprofeta et aiyu inliinmopon aien va Atua, um imiaiji intas alep o un, va nimiatamai yin o Atua. 12 Et aktaktai aien mika yi ago naaurinig iran.

¹ ET atahaijeg nyak a Ihova, im intas ugyi yin unyak; va nitai inigki, et aiyu inliinmopok ainyak vai yin.

² Et mun idim atgeig pam intikgan ehelek aien; va nitai inigki, ekpu ahlaig vai yin ainyak irai iji adiat an numoh unyak.

³ Is arehed irak inwau eh mas vaig; is uhum pam nyak nohocred u uma atmas: kis ato nohocred ainyak im nerekinman irak.

⁴ Jai kis par ahlaig ainyak va nidai Ihova; ek ugyi euc ainyak, ak Ihova, mika an imiatamaig nyak aiek.

⁵ Et upene a Ihova, et atoh nedo o un; et idim aiheuc va atimi a Atua uja.

⁶ Et aminjinaig ilpu atimi eklim amen a Ihova: kis auatialidi ainyak, ja is imiatamaig nyak aien.

⁷ Ak nesgak, namu lep amen upene aiek; et mun idim ago nedo upene vai euc a Ihova.

⁸ Ak Atua, na mun idim imiatamaig nyak aiek vai inmas, im nesganimtak vai intaig, im neduok va yi jim epihtau.

⁹ Ekpu atga ainyak an nuhup u Ihova an pece u ilpu atimi umumoh.

¹⁰ Kis imiisjis ninveijec ainyak, va nitai inigki, ek mun tas ainyak: is alupas nohocred unyak:

¹¹ kis imtitaig ainyak, um ika, Era asan tas ahcil natimi asega.

¹² Ekpu alupai Ihova inhe ainyak va nedo upene asega o un vai nyak?

¹³ Ekpu leh nipjinitai ainyak va nimiatamaig nyak, um arohwai nidai Ihova.

¹⁴ Ak Ihova, el et upene iram, ekpu ehneijid intas upyi asaig unyak ainyak ehelum, an nuhup u ilpu atimi unyum asega.

¹⁵ Ak Ihova, et itai esjilid an nuhup unyum inmas u ilpu atimi upene unyum.

¹⁶ Ak Ihova, ek idim aheca umyum ainyak; ek aheca unyum ainyak, um hal u naheca atahig unyum: na mun ahiyi niji itai arore nyak aiek.

¹⁷ Ak Ihova, ekpu ahlap vai euc ainyak an nitai ahlap naaurinig; ekpu lep arohwai nidam ainyak.

¹⁸ Ak Ihova, el et upene iram, ekpu ehneijid intas upyi asaig unyak ainyak ehelum an nuhup u ilpu atimi unyum asega,

¹⁹ anliin nokoro an neom u Ihova, an nuarin juju ehelemia, ak nup u Jerusalem. Akumu imiahpas Ihova aijaua.