Saam 115 - Intas Etipup

SAAM 115.

1 Et idim esjilid natimi alupas u Atua, 4 era lep takitai a ilpu atmas, 9 er ahugni atimi mika eri asgeig ira Atua, 12 eris idim ika eri imiahpas Atua va nedo aiheuc o un.

¹ UHMU jim imiahpas cama, ak Ihova, uhmu jim imiahpas cama, jam imiahpas nidam, va naiheuc unyum, im intas inveijec unyum.

² Era a uri a nup urai iji pece par ika, Atua ura yek eda?

³ Ja et amen a Atua unyima an nohatag: et mun ago niji itai asega aien is upene iran.

⁴ Et silver im colt natmasimai ura, nauritai irai ikma atimi.

⁵ Et eteuc nipjineucsera, ja era eti tas ara: et eteuc nesganimtara, ja era eti alum itai ara:

⁶ et eteuc intikgara, ja era eti ahgei itai ara: et eteuc ingidjira, ja era eti ipni itai ara:

⁷ et eteuc nikmara, ja era eti ubli itai ara: et eteuc neduora, ja era eti atga ara: et eti eteuc tah nohrara irai hujgopul ura.

⁸ Erupu idivai ra a ilpu atimi ago ra; ara asega marom era asgeig ira ra ara.

⁹ Ak nup Isreel, akumu asgeig irai Ihova aijaua: et atau imi ra aien, um imiatamai ra.

¹⁰ Ak ilpu mapoi Eron, akumu asgeig irai Ihova aijaua: et atau imi ra aien, um imiatamai ra.

¹¹ Ak ilpu atimi imtitai Ihova, akumu asgeig irai Ihova aijaua: et atau imi ra aien, um imiatamai ra.

¹² Et mun imiehva caija a Ihova: etpu asan tas acis yi alwai vai caija aien; etpu asan tas acis yi alwai vai nup Isreel aien; etpu asan tas acis yi alwai vai ilpu mapoi Eron aien.

¹³ Etpu asan tas acis yi alwai aien vai ra era imtitai Ihova ara, ilpu ihki atimi im ilpu atimi alupas.

¹⁴ Etmu ika a Ihova aki ahinag aijaua, aijaua marom im lep ilpu hal unyimia.

¹⁵ Eka mun ahesmoij aijaua vai Ihova is ago nohatag aien im nobohtan.

¹⁶ Is ati nohatag a Ihova mika yi amen iran aien: ja is alupai atimi nobohtan aien.

¹⁷ Era eti imiahpas Ihova a ilpu atimi emesmas, ka tah irai ra sji igki era asuolse anliin nehpanitai ara.

¹⁸ Ja intupu imiahpas Ihova akaija an nopan inig um yetpan irai iji mesese. Akumu imiahpas Ihova aijaua.