Saam 114 - Intas Etipup

SAAM 114.

Er ahugni atimi mika eri ecen va Atua an nuarin itap o un; et ago nedo inigki niji itai pop.

¹ ERIS wat ahes an pece Ijipt a nup Isreel, um lep ahes ehele atimi iji ig is eche intas ura a ilpu mapoi Jekob;

² is uarin itap vai yin inpece u nup u Juta, is lep atimarid an pece u nup Isreel aien.

³ Is ecetai nemda o un injap um aha: is lep adumoij um ame nofowai Jortan.

⁴ Is aliaujai niji au et idivaig siip atamaig, im niji edoon et idivaig inhakli siip.

⁵ Na a uri aiek, ak injap, par aha? im nofowai Jortan, par adumoij um ame?

⁶ im niji au par aliaujai et idivaig siip atamaig; im niji edoon et idivaig inhakli siip?

⁷ Namu eucjeucjeucaij aiek, ak nobohtan, um aha vai Natimarid; um lep aha va Atua u Jekob;

⁸ aien aigki is ika aien yi eteuc netpenwai an hehteuc, im lep yi eteuc nimtanwai an hetmi.