Saam 112 - Intas Etipup

SAAM 112.

1 Erupu amen upene an nopan inig a ilpu atimi ecen va Atua, 4 im lep an nopan iyehki. 10 Erupu auatitai a ilpu atimi auatatimi va namen upene u ilpu atimi upene.

¹ AKUMU imiahpas Ihova aijaua. Et mun ahesmoij a natimi inig et imtitai Ihova aien, um imiacitak alupas intas alep o un.

² Erupu esjilid a ilpu mapon an nobohtan: erupu ahesmoij a ilpu mapoi ilpu atimi upene.

³ Etpu amen naga im niji itai alupas anliin neom o un: etpu lep amen nedo upene o un irai iji mesese.

⁴ Et aridjai inlah an napat va ilpu atimi upene: era ago nedo upene ara; era aiheuc va atimi ara um ago nedo atoh.

⁵ Et mun ahesmoij a natimi inig et aiheuc va atimi aien, um alupai ra itai: etpu aminjinaig niji itai o un aien an nedo atoh.

⁶ Inyi idim eti amaamai aien irai iji mesese: uhpu imiehva nedo atoh o un um yetpan irai iji mesese.

⁷ Etu wit atahaijeg intas va nohocred aien, etpu eti imtitaig aien: et amen aktit inliinmopon aien, um asgeig irai Ihova.

⁸ Et emda inliinmopon aien; inyi eti imtitaig aien, um imihum pan an nopan iyehki, etpu almoi ilpu atimi tak atimi iran aien, um esjilid ira ra.

⁹ Et mun eduaraprap irai itai o un aien, et alupai ilpu ihki atimi itai aien; et amen nedo atoh o un irai iji mesese; uhpu ago nedo ecen esjilid vai yin.

¹⁰ Erupu almoi a ilpu atimi auatatimi, um auatitai vaig; erupu ataktit neijira ara, ja pah mas: etpu tiih inmerit u ilpu atimi auatatimi.