Saam 111 - Intas Etipup

SAAM 111.

1 Et ahugni atimi a naprofeta an nedo o un, mika eri imiahpas Atua va niji auritai esjilid o un, 5 im nedo aiheuc o un. 10 Erupu arapakau ara sji igki era ecen va Atua ara.

¹ AKUMU imiahpas Ihova aijaua. Ekpu ago naaurinig vai Ihova ainyak an liinmopok asega, an nuhup u atimi, an nasjapicnaig u ilpu atimi upene marom.

² Et esjilid nauritai u Ihova; era wat ahilek natimi, era merit ara asega vaig.

³ Et upene um esjilid nauritai o un: et lep amen nedo atoh o un irai iji mesese.

⁴ Et mun ika aien eri imiehva niji auritai imiali o un: et aiheuc va atimi a Ihova, et lep esjilid acen naiheuc o un.

⁵ Et mun alupai ilpu atimi imtitai yin aien nitai caig incara: etpu imiehva intas etipup o un aien um yetpan irai iji mesese.

⁶ Et mun ehvaig ehele ilpu atimi o un aien niji auritai emda o un, va etpu alupai ra inuarin pece iji ig eris ohuun a nup urai iji elcau.

⁷ Et inveijec um atoh nauritai an nikman; et idim inveijec intas alep asega o un.

⁸ Et amen aktit intas o un irai iji mesese; et auritai aien an nedo inveijec im nedo atoh o un.

⁹ Is imiatamaig ilpu atimi o un aien: is ati intas etipup o un aien mika yi amen irai iji mesese: et itap nidan, eri lep ecen vaig.

¹⁰ Natupun narapakau nigki, nikavaig, nimtitai Ihova: et eteuc upene lelra sji igki asega era apos intas alep o un ara: et amen aktit nimiahpas vai yin irai iji mesese.