Saam 11 - Intas Etipup

SAAM 11.

1 Et ago emda inliinmopon a Tevit, um ika, etpu atau imi yin a Atua, um aat irai ilpu atimi tak atimi iran. 4 Et aminjinaig atimi a Atua um ago nedo atoh vai ra.

¹ EK asgeig irai Ihova ainyak: eka a uri aijaua par auahas inliinmopok, um ika, Namu aha pan aiek an nedoon unyum et idivaig inman.

² Erupu idim aiyihi inceen nefana ura a ilpu atimi auatatimi; era mun ati upene nefana ura an ya ara, mika eri ahcai ilpu atimi inveijec ara an napat.

³ Uhpu idim auahas nohuun itai; era ago inhe a ilpu atimi upene?

⁴ Et amen a Ihova anlin neom ahlap itap o un, et eteuc nitai ateuc u Ihova an nohatag: et alum atimi aien; et almaijidjid ilpu hal u atimi an nesganimtan aien.

⁵ Etpu ahilek inliinmopoi ilpu atimi upene a Ihova; ja et amcel vai ilpu atimi auatatimi aien, im ilpu atimi merit va nehcerucai atimi.

⁶ Etpu imiasuol nohocred alupas aien, im incap, im narekwas, im lep nehio esjilid, irai ilpu atimi auatatimi; nimtan imi ra ji igki.

⁷ Et idim atoh nedo o Ihova; et merit va nedo atoh aien; erupu ahnoi nesganimtan a ilpu atimi et inveijec inliinmopora.